“ПСЖ” ҳужумчиси Килиан Мбаппе Франция чемпионатининг 1-турини ўтказиб юборади.
ESPN нашрининг хабарига кўра, ҳужумчи 12 август куни “Парк де Пренс”да бўлиб ўтадиган “Лорян”га қарши баҳсда иштирок этмайди.
Мбаппе клуб билан янги шартнома борасида келиша олмаётгани сабабли бош мураббий Луис Энрике қўл остида машғулотларда иштирок этгани йўқ.
Килиан август ойида бўлиб ўтадиган ўйинларни (“Лорян”, “Тулуза” ва “Ланс”) ўтказиб юбориши мумкин. Клуб футболчини шу тариқа жазоламоқчи.
Эслатиб ўтамиз, франциялик ҳужумчи парижликлар билан 2024 йилда ўз ниҳоясига етадиган шартномасини янгилашни истамаяпти. Килианга Мадриднинг “Реал” жамоаси жиддий қизиқиш билдирмоқда.
Парижликларга 24 ёшли футболчи ўзини жамоа лойиҳасининг бир қисми деб ҳисобламай қўйгани ёқмаяпти. Шу билан бирга бошқа клублардан келаётган таклифлар ҳамда Париж клуби билан шартномани узайтириш вариантларини рад этмоқда.
Аввалроқ, Франция президенти Эммануэл Макрон футболчини “ПСЖ”да қолишга кўндиришга уриниб кўрмоқчилиги хабар қилинганди.
Изоҳ (0)