Актёр Дуэйн Жонсон барча пулларини қишлоғидаги қудуқ қазилишига сарфлаган UFC жангчисига уй совға қилди

Актёр ва WWЕ собиқ юлдузи Дуэйн Жонсон UFC жангчиси Темба Горимбога уй совға қилди. Нега Жонсон машҳур бўлмаган жангчига ёрдам берди?

Горимбо UFC’га ўтганидан сўнг спортзалда яшаган ва ҳисобида 7 доллар пул бўлган. У бисотидаги ҳамма нарсани сотиб, пулларни Африкадаги қишлоғида қудуқ қурилишига сарфлаган

Темба Горимбо — UFC ярим ўрта вазн тоифасида жанг қиладиган 32 ёшли спортчи Зимбабведа таваллуд топган ва кейинчалик АҚШга кўчиб ўтган. У февраль ойида промоушендаги дебютини ўтказган. Илк жангида мағлубиятга учраган Горимбо май ойида иккинчи жангида иштирок этган. Такаши Сатога қарши октагонга кўтарилиб, уни мағлуб этган. Бу Темба учун муҳим ғалаба эди.

“Февралдаги мағлубиятни жуда оғир қабул қилдим. UFC билан шартнома имзоласанг, иштирокинг учун 10 минг доллар, ғалабанг учун 10 минг доллар оласан. 30% солиқларга кетса, яна 10 фоизини мураббийга берилади. Мен парвозлар ва меҳмонхоналар учун 2 минг доллар тўладим. Агар мағлуб бўлсанг, уйинга ҳеч вақосиз қайтасан”, — тушунтиради Горимбо. 

Сатога қарши жанг олдидан унда 7 доллар пул бор эди ва мураббий Даниэль Вальвердега қарашли MMA Masters спортзалида тунаб қоларди. Баъзан овқат ҳам бўлмасди, ўшанда Колби Ковингтон уни кўришга тез-тез келиб турган. “Яхши ғалабага эришдим, кейинчалик яна кўплаб зафарлар қучаман. Агар UFC томонидан бериладиган текин овқат бўлмаганда, барчаси бошқача бўлиши ҳам мумкин эди. Миннатдорман”, — дейди Горимбо.  

Ғалабадан кейин Горимбо 7000 долларлик жиҳозларини сотиб, уни уй олишга эмас, Зимбабведаги қишлоғида одамлар яхши яшаши учун қудуқ қазилишига сарфлади. Бу ҳақида Дуэйн Жонсон хабар топади: “Бир пайтлар менда ҳам 7 доллар бор эди. Мен ҳам ушбу курашда иштирок этганман. Мен сенга ёрдам бераман, дўстим”, — деди.  

Жонсон томонидан 2012 йилда асос солинган Seven Bucks студияси номига айнан 7 доллар сарфланган. “Мен ва у, биз Seven Bucks’нинг йигитларимиз. Энди сиз етти менинг бахтли рақамим эканлигини биласиз”, — деди Горимбо кумири билан учрашувда. 

Бу воқеа Темба Майамидаги спортзалда интервью бераётган вақтда юз берди. Жонсон унинг ортидан келди ва Горимбо уни кўрди ва хурсандлигидан кўзидан ёш чиқиб кетди. Учрашув вақтида актёр спортчига уй совға қилди. 

“Биз ҳеч қачон кўришмаганмиз, лекин мен айнан шу инсонни кўриш, унинг кўзига қараш, қўлини сиқиш учун Майамига учиб келдим. Бу воқеа менга таъсир қилди ва руҳлантирди. Ўзига уй қидириш ўрнига у қишлоғидаги қудуқ қурилиши учун сарфлаган. У мендан ҳеч нарса сўрамади, лекин мен ёрдам беришни хоҳладим”. 

Горимбо 13 ёшида ота-онасидан айрилган, Африка чегарасидан ўтишда вафот этиши мумкин эди

• Горимбо 13 ёшида ота-онасидан айрилган. 16 ёшида эса очдан ўлмаслик учун ноқонуний равишда олмос майдонларига кирган. 

• Ўша олмос майдонларида уни ит тишлаб олган: “Болалигимда жуда кўп воқеаларни бошдан кечирганман, кўз олдимда одамлар вафот этарди. Олмос майдонларида ишлаганимда, полиция одамларни шунчаки отиб ташларди. Ҳаттоки, одамлар олмос контрабандаси туфайли бир-бирини ўлдирарди”.

• Зимбабведан ЖАРга қочиб кетган. Биринчи уриниш муваффақиятсиз якунланган. Уни ушлаб олишган ва Зимбабвега депорт қилишган. Иккинчи уринишда эса уни ўлдириб қўйишлари мумкин эди: 

“Аввал одамлар кўз олдимда ўлдирилишини кўрардим. Мен билан эса бу ҳодиса илк бор бўлиши эди. Мен ноқоқуний равишда ЖАР чегарасига ўтаётгандим. 

Бизни жиноятчилар ушлаб олди. Уларни кўриб, шерикларим қочиб кетди. Мен эса ерга ётиб олдим, жиноятчилар эса шерикларимни қувлаб кетди”. Шу тариқа Горимбо ЖАР томонга ўтиб кетган.  

• “Ҳеч қачон таслим бўлма” фильми орқали MMA’га муҳаббат қўяди ва 19 ёшида спорт билан шуғуллана бошлайди. Машғулотлардан уч ой ўтиб, илк жангини ўтказади ва ғалаба қозонади.