INRI номли Евангелист руҳий черковининг раҳбари Элайжа Аёделе АҚШ президенти Жо Байденни Нигерга бостириб киришдан огоҳлантирди. Бу ҳақда Daily Post хабар берди.
Аёделе Нигерга бостириб кириш “Худога қарши курашиш билан баробар” эканидан огоҳлантирди ва бу учинчи жаҳон урушига олиб келиши мумкинлигини таъкидлади.
Огоҳлантиришга АҚШ давлат котиби ўринбосари вазифасини бажарувчи Виктория Нуланднинг Нигердаги исёнчилардан ағдарилган президентни ҳокимиятга қайтаришни сўрагани сабаб бўлган.
Аёделе АҚШнинг Нигерга эҳтимолий бостириб кириши “шайтоний ва террористик ҳаракат” эканини айтди. У Байденни Нигер халқига демократияни қайтаришга мажбурлашдан кўра, ўз келажагини ҳал қилишига рухсат беришга чақирди.
“АҚШ Нигерга бостириб кирса, бу шайтоний ва террористик ҳаракат бўлади. Байден Худонинг ғазабини қидираётганини англатади. Бу учинчи жаҳон урушини бошлаш учун воситадир”, — дейди у.
Шунингдек, у Нигерга бостириб киришга уриниш 2024 йилги АҚШ президентлик сайловлари олдидан Байден фаолиятининг қулашини ангалтишини таъкидлади.
Нигерда ҳарбий тўнтариш
Нигерда 26 июль куни ҳарбий тўнтариш содир бўлди. Президент гвардияси давлат раҳбари Муҳаммад Базумни ҳокимиятдан четлатди. Икки кундан сўнг президент гвардияси бошлиғи генерал Абдураҳмон Тчиани ўзини янги давлат раҳбари деб эълон қилди.
ECOWAS мамлакатлари Нигерга ҳарбийларни киритишга тайёрлигини эълон қилди. Бунга жавобан давлат тўнтаришлари натижасида ҳокимиятга келган ҳарбийлар томонидан бошқариладиган Мали ва Буркина-Фасо “Нигер ишларига ҳар қандай ҳарбий аралашув уларга қарши уруш эълон қилиш билан баробар бўлишини” билдирди.
Изоҳ (0)