Миллиардер Илон Маск Twitter компанияси номини Х’га ўзгартирганидан бир неча ҳафта ўтиб, компаниянинг собиқ рамзий белгилари ва бошқа буюмларини кимошди савдосига қўймоқда, деб хабар берди BBC.
Кимошди савдоси “Twitter ребрендинги: ёдгорлик, санъат асарлари, офис активлари ва бошқаларнинг онлайн аукциони!” деб номланади. Таклиф этилаётган 584 та лот орасида кофе столлари, катта ўлчамдаги қуш қафаслари ва тармоқда энг кўп лайк йиғган суратлар бор.
Шунингдек, рўйхатда ўнлаб стол-стуллар, DJ кабинаси ва битта гуруҳни жиҳозлашга етарли мусиқа асбоблари мавжуд. Улар орасида гитаралардан тортиб барабан тўпламлари ва овоз кучайтиргичларгача, контроллер, миксерлар ва динамикларни кўриш мумкин.
Аукционга қўйиладиган Twitter белгиларидан бири ҳали компаниянинг Сан-Франсискодаги штаб-квартирасида ўрнатилган турибди. Харидор тегишли рухсатнома асосида уни ўша ердан олиб кетиши мумкин.
Аукционга Twitter’да машҳур бўлган иккита суратнинг мўйқаламда чизилган расми қўйилади. Биринчиси — Эллен Дегенереснинг 2014 йилги Академия мукофотларида олинган машҳур селфиси. Иккинчиси — 2012 йил ноябрь ойида АҚШ президенти Барак Обама қайта сайланганидан сўнг Twitter’га жойлаган сурати. Ўша пайтда ушбу сурат платформанинг энг кўп лайк йиғган твитига айланган.
Heritage Global Partners аукцион уйи маълумотларига кўра, ҳар бир лот учун минимал таклиф 25 долларни ташкил қилади.
Савдолар 12 сентябрда бошланади ва икки кун давом этиши режалаштирилган.
2022 йилда Twitter компаниясини сотиб олганидан бери Маск харажатларни камайтириш мақсадида минглаб иш ўринларини қисқартирди. Йил бошида Twitter Сан-Франсискодаги бош қароргоҳидаги юзлаб буюмларни аукционга қўйганди.
Компаниянинг машҳур қуш логотипи ҳайкали энг юқори таклифни олиб, 100 000 долларга сотилган.
Twitter Х’га ўзгарди
24 июль куни Twitter ўз логотипини кўк қушдан Х ҳарфи тасвирланган белгига ўзгартирди. Маск Twitter номини Х деб ўзгартириш режалари ҳақида 1 июнь куни гапирганди. У келажакда ижтимоий тармоқнинг функционал имкониятлари кенгайиши, шу сабабли Twitter бренди бунга мос тушмаслигини айтган. Шунингдек, у янгиланадиган платформада эски Twitter’га қараганда узунроқ постлар, видеолар чоп этиш, хабарлар алмашиш ва молиявий хизматлардан фойдаланиш имкони бўлишини маълум қилган.
Изоҳ (0)