Тошкентда Malibu-2 пиёдани уриб кетди (видео)

ИИВ ЙҲХХ Тошкент шаҳар Яккасарой туманида содир бўлган йўл-транспорт ҳодисаси ҳақида маълумот берди.

Қайд этилишича, 8 август куни соат 23:50 ларда Яккасарой тумани Кичик ҳалқа автомобиль йўли кўчаси 1-уй қаршисида 21 ёшли Ш.Ғ. Malibu-2 русумли автомашинасини бошқариб кетаётиб, йўлнинг белгиланмаган қисмидан кесиб ўтаётган пиёда — 74 ёшли М.Ҳ.ни уриб юборган.

ЙТҲ оқибатида пиёда олган тан жароҳатлари натижасида воқеа жойида вафот этган.

Ҳолат юзасидан Тошкент шаҳар ИИББ Тергов бошқармаси томонидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми билан жиноят иши қўзғатилган. Тергов давом этмоқда.

Пиёдалар билан боғлиқ ЙТҲлар

Июль охирларида Тошкентнинг Яккасарой туманида йўлнинг белгиланмаган қисмидан кесиб ўтаётган пиёда автобус уриб юборишидан вафот этганди. Шунингдек, Олий Мажлис Қонунчилик палатаси биноси ёнидаги тартибга солинмаган пиёдалар ўтиш йўлида йўл-транспорт ҳодисаси содир бўлган эди. Damas автомашинаси тартибга солинмаган пиёдалар ўтиш жойида йўлни кесиб ўтаётган пиёдани уриб юборган. ЙТҲ натижасида тан жароҳат олиб шифохонага ётқизилганлар ҳақида маълумот келиб тушмаган.

Июнь ойида бўлса Тошкент вилояти Қибрай туманида маст ҳайдовчи “ВАЗ-2106” (“Жигули”) билан уч нафар болани уриб юборган ва жабрланувчилардан бири вафот этганди.