Россия Хавфсизлик кенгаши раиси ўринбосари Дмитрий Медведевга тегишли экани айтилаётган Universe яхтаси Истанбулда аниқланди. Россиялик журналист Глеб Пяних томонидан суратга олинган видеода мазкур яхтани кўриш мумкин.
Пянихга кўра, кема Туркия портига Қрим кўпригига зарбалар берилиши ва Россиянинг дон битимидан чиқишидан бир ҳафта олдин кирган. Унинг Туркияга зудлик билан кўчирилиши Россия расмийлари Сочи порти ва Қора денгизни энди хавфсиз деб ҳисобламаслигини кўрсатиши мумкин.
“Афтидан, Медведев ниманидир билган... Яхта ўтган йили (2022 йил) кузда Сочида қайд этилган. Украинада уруш бошланишидан олдин у Италияда бўлган ва уруш бошланиши билан яхта зудлик билан аввал Истанбулга кўчирилган, сўнгра Сочига олиб кетилган”, — деб эслатди Пяних.
Қайд этилишича, Истанбулда Universe фақат маҳаллий аҳолига маълум бўлган кўрфазга боғланган. Яхта расман офшор компанияда рўйхатдан ўтган. Айрим маълумотларга кўра, у Россия собиқ энергетика вазири Игор Юсуфовга тегишли. Аввалроқ бу яхтада Юсуфовнинг ўғли Медведевнинг ўғли Илья билан дам олган.
75 метрли Universe яхтаси 2018 йилда Нидерландияда Damen Yachting томонидан қурилган ва Кайман оролларидан Southerner Ltd офшор компаниясида рўйхатдан ўтган.
Компаниянинг ҳақиқий эгаси номаълум. Кеманинг нархи камида 100 миллион долларга баҳоланмоқда. У бир вақтнинг ўзида олтита кабинада 12 кишини сиғдира олади. Шунингдек, 19 нафар хизмат кўрсатувчи ходим учун хоналар ажратилган.
Изоҳ (0)