“Дарё”нинг YouTube’даги каналида собиқ телебошловчи Лола Зуннунова билан суҳбат ташкил этилди. У телеканалдан кетиш сабаблари, мотиваторлик фаолияти ва аёлларни қийнаётган муаммолар ҳақида гапирди.
— Телевидениеда ишлаётганимда кўпчилик мени кибрли инсон деб биларди. Кўп инсонлар билан гаплашмасдим, чунки суҳбат кутилмаган ҳолда ғийбатга аралашиб кетади. Ўзимни чеклаш учун суҳбат ва муҳокамалардан нари юришга ҳаракат қилардим. Буни эса атрофдаги инсонлар кибр ва менсимаслик деб тушунишар экан.
Йўналишим бирдан ўзгарди, деёлмайман. Аввалдан ўз устида ишлашга, ўзимни ислоҳ қилишга одатланганман. Фақат авваллари буни омма билан ўртоқлашиш имкони бўлмаган. Ижтимоий тармоқларнинг оммалашиши сабаб ўзимдаги фикрларни омма билан ўртоқлашиш имкони пайдо бўлди.
Ҳар бир соҳанинг чўққиси бўлади. Шифокорликка ўқиётган талаба кун келиб бош шифокор бўлишни орзу қилади. Бошловчи бўлган инсон эса бош муҳаррир ёки директор бўлишни истайди. Сурхондарёнинг кичик шаҳарчасида телевизор қаршисида ўтириб, бошловчи бўлишни орзу қилган қиз эдим. Жалолиддин Румий “Амалга ошмайдиган орзулар қалбга солинмайди”, деганидек, мен ҳам оддий мухбирликдан телеканал бош директори лавозимигача ишладим. Менимча, ўзбек телеканалига раҳбар бўлган биринчи аёл сифатида тарихда қолсам ҳам ажаб эмас. Хўп, орзулар ушалди, энди-чи, деб ўз-ўзимга савол бердим. Шунда илм олишим керак, деган қарорга келдим. Мотиватор бўлиш хаёлимда ҳам бўлмаган. Атрофимдаги қизлар “Чиройли гапирасиз, буни бошқаларга ўргатинг. Сиз гапирсангиз таъсирли чиқади, кўнгилга етиб боради”, дейишганидан кейин Instagram саҳифасини юрита бошладим. Ҳар ҳолда 23 йиллик бошловчилик тажрибаси қўл келди. Мен психолог эмасман, шунчаки ўз тажрибаларим орқали одамларга оз бўлса-да, ёрдам қилишни ният қилганман, холос, — дейди Лола Зуннунова.
Лола Зуннунова хусусий телеканал директори вазифасидан кетганидан кейин бир нечта телеканаллар уни раҳбарлик лавозимларига ишга таклиф қилишган. У нима учун таклифларни рад этганини қуйидагича изоҳлади.
— Ҳақиқатан ҳам, таклифлар жуда кўп бўлди. Ўша пайтда янги телеканал ҳам иш фаолиятини бошлаётган эди. Жуда катта маош ваъда қилишди, аммо танлаган йўлимдан воз кечмайман, дедим. Чунки мен шунча йил давомида ишлашдан, доимо иш ва оилани бирдек олиб боришдан чарчаган эдим. Аёл қанчалик уринмасин, барибир оила ва ишни бирдек олиб боролмайди. Шу боис таклифдан осонликча воз кечдим.
Отам раҳматли “Пулнинг ортидан қувма, унинг ўзи сени топади”, деб кўп айтарди. Ака-укаларимнинг бири банкда, бошқаси вазирликда ишлайди. Уларга ҳам, биз қизларга ҳам пулнинг ортидан қувма, деб ўргатганлар. Хуллас, мен пулни ўйлаганим йўқ. Чунки мен аёл кишиман, рўзғор барибир турмуш ўртоғимнинг зиммасида. Мен фақатгина кўпроқ вақтим бўлиши, буни оилам, фарзандларим ва илм ўрганишга сарфлашни истадим.
Лола Зуннунова ўз тажрибаларидан келиб чиққан ҳолда фарзандларни тарбиялаш борасидаги мулоҳазаларини айтиб ўтди.
— Ота-оналар болаларига “Сен менга кераксан”, деб кўп айтишлари керак. Бу сўз бола учун шунчалик аҳамиятлики, унда ўзига бўлган ишончнинг ўсишида муҳим ўрин эгаллайди. “Сен шуни қилишга мажбурсан”, “Овозингни юм, ғинг дема”, “Одамлар нима дейди?” деган гап-сўзлар эса аксинча унинг руҳиятини ерга уради. Зўравонликка учраган аёлларни ўрганганда бир нарсага гувоҳ бўлдим. Уларнинг кўпчилиги болаликда ана шундай муҳитда улғайган ва эр урса — ур оши, сўкса — сўк оши, деб ҳаммасига чидайди. Бу эса руҳий зўриқиш билан боғлиқ қатор муаммоларни келтириб чиқаради, минг афсуски, бундай аёллар тарбиялаган болалар ҳам руҳан соғлом бўлмайди. Биз айбни бошқалардан излашга одатланганмиз, аммо ҳеч бир масалада ўзимизда ҳам айб борлиги ҳақида ўйлаб кўрмаймиз. Болалар билан кўпроқ гаплашиш, худди катталар сингари фикрлари билан қизиқиш керак. “Сен менга кераксан, Аллоҳнинг берган неъматисан”, деб мақталган болада ишонч бўлади.
Кейин жамиятимизда қизларнинг тарбиясини фақат муомала ва уй ишларини бажариши билан баҳолаймиз. Қиз бола уй ишларини билдими, тамом, демак, у келажакда қийналмайди. Афсуски, унинг таълим олиши, ҳунар ўрганишига энг охирги даражадаги масала деб қараймиз. Аслида, қизларнинг зўравонликка учрашида қайсидир маънода ўзимиз ҳам айбдормиз. Чунки ўзимиз уларни қулликка тайёрлаяпмиз, — дейди Лола Зуннунова.
Суҳбатни қуйидаги ҳавола орқали томоша қилишингиз мумкин:
Изоҳ (0)