Мисрда автоҳалокатга учраб, оғир тан жароҳати олган ўзбекистонлик аёл икки ой даволанишдан сўнг ватанга қайтарилди. Бу ҳақда “Дунё” АА хабар берди.
Ўзбекистоннинг Мисрдаги элчихонаси берган хабарга кўра, Ўзбекистон фуқароси С.Н. 6 июнь куни Қоҳира шаҳрида ЙТҲга учраб, оғир тан жароҳати олган.
Бемор тан жароҳатлари билан Қоҳира шаҳридаги шифохоналарнинг биридаги интенсив терапия бўлимига жойлаштирилган. Ўтказилган текширувлар натижасида унга ўпкада пневмоторакс, тос суяги ва чап оёқ синиши ташхиси қўйилган ҳамда юз ва танада кўплаб гематомалар аниқланган.
Қайд этилишича, элчихона ходимлари биринчи кундан эътиборан беморнинг ҳолатини мунтазам назоратга олган. Жумладан, Миср Соғлиқни сақлаш вазирлигининг амалий кўмагида бемор 12 июнь куни Қоҳирада нуфузли ва йирик ҳисобланган “Насер тадқиқотлар ва даволаш институти” клиникасига Миср ҳукумати инсонпарварлик ёрдами тариқасида бепул муолажа учун жойлаштирилиб, икки ойга яқин вақт мобайнида шифохонада бемор учун керакли барча тегишли тиббий кўрик ва тадқиқотлар амалга оширилган.
Қоҳирадаги элчихона, Uzbekistan Airways, Миср Соғлиқни сақлаш вазирлиги ва Ўзбекистондан етиб келган мутахассислар кўмагида фуқаро С.Н. Шарм аш-Шайх—Тошкент йўналишидаги рейс орқали 5 август куни Ўзбекистонга олиб келинган.
“Элчихона Мисрга боришни режалаштирган барча ватандошларимизга хорижга чиқишдан олдин тиббий суғурта қилдиришни, ўзга юртда бўлиш чоғида ўз хавфсизликлари учун ғамхўрлик қилишларини сўрайди”, — дейилади хабарда.
Изоҳ (0)