Италия бош вазири 160 мингдан ортиқ оилани ижтимоий нафақадан маҳрум қилди

Италия бош вазири Жоржи Мелони “меҳнатга лаёқатли” деб топилган минглаб оилаларни ижтимоий нафақадан маҳрум қилди.

Италия бўйлаб тахминан 169 минг оила келаси ойдан нафақалар тўхтатилиши ҳақида SMS хабар олди.

Оиласида ногирон, вояга этмаган ёки 65 ёшдан ошган аъзоси борлардан ташқари барча нафақа олаётганларга пуллар берилиши тўхтатилади.

шу пайтга қадар Италияда “reddito di cittadinanza” (сўзма-сўз таржимаси “фуқаронинг даромади”) деб номланган дастур мавжуд бўлиб, унга кўра кам таъминланганлар ва ишсизларга давлат томонидан нафақа тўлаб келинаётганди.

Бу дастур 2019 йилда “Беш юлдуз ҳаракати” (М5S) партияси аъзоси, Италия вазирлар кенгаши раиси Жузеппе Конте томонидан киритилганди. Энди эса Жоржи Мелони  ҳукумати томонидан бекор қилинмоқда.

Мелони ўтган йили Италиянинг янги бош вазири лавозимини эгаллаганидан сўнг дарҳол ижтимоий таъминот тизимини қайта кўриб чиқиш қарорини эълон қилиб, 2024 йил 1 январдан бошлаб меҳнатга лаёқатли ҳисобланган 18 ёшдан 59 ёшгача бўлган ишсизлар учун бу тизим бутунлай бекор қилинишини айтганди.