Italiya bosh vaziri 160 mingdan ortiq oilani ijtimoiy nafaqadan mahrum qildi

Italiya bosh vaziri Jorji Meloni “mehnatga layoqatli” deb topilgan minglab oilalarni ijtimoiy nafaqadan mahrum qildi.

Italiya bo‘ylab taxminan 169 ming oila kelasi oydan nafaqalar to‘xtatilishi haqida SMS xabar oldi.

Oilasida nogiron, voyaga etmagan yoki 65 yoshdan oshgan a’zosi borlardan tashqari barcha nafaqa olayotganlarga pullar berilishi to‘xtatiladi.

shu paytga qadar Italiyada “reddito di cittadinanza” (so‘zma-so‘z tarjimasi “fuqaroning daromadi”) deb nomlangan dastur mavjud bo‘lib, unga ko‘ra kam ta’minlanganlar va ishsizlarga davlat tomonidan nafaqa to’lab kelinayotgandi.

Bu dastur 2019-yilda “Besh yulduz harakati” (M5S) partiyasi a’zosi, Italiya vazirlar kengashi raisi Juzeppe Konte tomonidan kiritilgandi. Endi esa Jorji Meloni  hukumati tomonidan bekor qilinmoqda.

Meloni o‘tgan yili Italiyaning yangi bosh vaziri lavozimini egallaganidan so‘ng darhol ijtimoiy ta’minot tizimini qayta ko‘rib chiqish qarorini e’lon qilib, 2024-yil 1-yanvardan boshlab mehnatga layoqatli hisoblangan 18 yoshdan 59 yoshgacha bo‘lgan ishsizlar uchun bu tizim butunlay bekor qilinishini aytgandi.