Ўзбекистонда 17 турдаги давлат монополиясини бекор қилиш режалаштирилмоқда. Бу ҳақда жамоатчилик муҳокамаси учун эълон қилинган “Ўзбекистон-2030” стратегияси лойиҳасида кўзда тутилган.
Ҳужжатга кўра, монопол соҳаларни бозор тамойилларига изчил ўтказиш, иқтисодиётда хусусий сектор улушини ошириш, тадбиркорларга эркин фаолият юритиши учун энг қулай шароитлар яратиш мақсад қилинган.
Республикада 17 турдаги давлат монополиясини бекор қилиш, ушбу соҳаларга хусусий секторни кенг жалб қилиш, давлат тасарруфида фақат магистрал энергия ва транспорт тармоқлари, давлат бошқаруви ва хавфсизлиги билан боғлиқ соҳаларни сақлаб қолиш режалаштирилмоқда.
Бундан ташқари, темирйўлда ташиш, автомобиль йўлларини қуриш ва бошқариш, газ ва электр етказиб бериш хизматлари хусусий секторга ўтказилади. Ирригация, чиқиндиларни қайта ишлаш, ижтимоий объектларда энергетика ва иссиқлик таъминоти тизимини бошқариш каби давлат монопол соҳаларида хусусий шериклик механизмлари кенг жорий этилади.
Иқтисодиётда нодавлат сектор улушини 85 фоизга етказиш, давлат улуши мавжуд 2,3 мингта корхоналар сонини 6 баробарга камайтириш кўзда тутилган.
Шавкат Мирзиёев 17 турдаги давлат монополияси бекор қилиниб, уларга хусусий сектор кенг жалб этилиши ҳақида ўз сайловолди дастурида ҳам маълум қилганди.
“Умуман, келгуси йилларда фақат магистрал энергия ва транспорт тармоқлари, давлат бошқаруви ва хавфсизлиги билан боғлиқ соҳалар давлат тасарруфида қолади”, — деган эди у.
Шавкат Мирзиёев 2030 йилга қадар иқтисодиётда нодавлат сектор улушини 85 фоизга етказиш асосий мақсад бўлишини таъкидлаганди.
Изоҳ (0)