Қашқадарёда йигит бегона аёлни кўчада судраб, каналга итариб юборди (видео)

Қашқадарё вилояти Қарши туманида йигит бегона аёлни кўчада судраб, каналга итариб юборди. Бу ҳақда “Миллар” дастурида хабар берилди. 

Ҳолат 23 июнь куни ярим тунда Қарши тумани Жумабозор маҳалласида содир бўлган. Эркак аёлни дастлаб сочидан тортиб судраган, кейин кўйлагини ечиб каналга итариб юборган. Аёл бу вақтда базмдан қайтаётган бўлган. 

Аёлнинг сўзларига кўра, шу куни у яқин дугонаси билан базмдан қайтаётган бўлган. 

“Меҳмондорчиликдан келаётгандик. У болалар бизга ёпишиб келди. Аҳамият бермай юришда давом этдик, улар эса судрай бошлади. Йўлни ўртасида судраб ариққа итариб юборишди. Тақинчоғимни, телефонимни олиб, кўйлагимни йиртиб ташлаган. Мажбурлаб зўрламоқчи бўлишган. Улар ичган ва чеккан эди. Мен ичмагандим, қўлимда ароқ бор эди, уйга олиб келаётгандик”, — дейди аёл.

Вилоят Ички ишлар бошқармаси ахборот хизматининг маълум қилишича, ҳозирда туман ички ишлар бўлими ҳузуридаги тергов бўлинмаси томонидан суриштирув ҳаракатлари олиб борилмоқда. Айбланувчи йигит ҳозирда қўлга олинган. Унинг ҳаракатлари юзасидан ҳуқуқий баҳо берилади.