Россиянинг Украинага кенг кўламли босқини бошланганидан бери 20 000 дан 50 000 гача украиналиклар бир ёки бир нечта аъзосидан айрилган. Бу ҳақда Украинанинг Houp Foundation хайрия ташкилотига ҳамда немис протезларини ишлаб чиқарувчи Ottobock компаниясига таяниб, The Wall Street Journal хабар берди.
Ottobock келтирган маълумотларда қўл-оёғидан айрилган 50 000 украиналик ҳақида сўз боради. Бу рақам ҳукумат ва тиббиёт муассасалари маълумотларига асосланади, деб тушунтирди нашр. WSJ таъкидлашича, ҳақиқий кўрсаткичлар бундан юқорироқ бўлиши мумкин, чунки протезлаш жараёни узоқ вақт талаб этади.
Киевда жойлашган Houp Foundation хайрия жамғармасининг хабар беришича, 200 минг украиналик оғир тан жароҳатларини олган, шундан 10 фоиз ҳолатда ампутация (тана аъзосини кесиб ташлаш) зарур бўлган.
WSJ қайд этишича, бу кўрсаткичларни Биринчи жаҳон урушидаги ҳолат билан солиштириш мумкин, ўшанда 67 000 германиялик ва 41 000 британиялик оёқ-қўлидан айрилганди. Шу билан бирга, ўша пайтда ампутация кўпинча жароҳатдан кейинги ўлимларнинг олдини олиш учун ягона ечим бўлган.
Уруш бошида ампутацияларнинг асосий сабаби артиллерия ва ракета ҳужумлари пайтида олинган жароҳатлар бўлган, ҳозир эса кўпчилик фронт чизиғига қўйилган миналардан яраланмоқда. Шифокор Константин Милицанинг сўзларига кўра, ҳозир асосий жанглар кетаётган Запорожье вилоятидаги касалхоналарга беморларнинг 40-80 фоизи қўл-оёқни кесишни талаб қилувчи жароҳатлар билан ётқизилмоқда.
Украиналик шифокорларни тайёрлайдиган глобал ҳарбий жарроҳлар гуруҳи раҳбари Аарон Эпштейннинг айтишича, Ғарб ҳарбий тиббиёти Иккинчи жаҳон урушидан кейин ҳали бундай кўламдаги жароҳатларни кўрмаган эди.
Протезларнинг нархи 50 минг еврогача етиши мумкин. Украина ҳукумати ҳарбийлар учун протез муолажасига 20 минг еврогача маблағ ажратмоқда, хайрия ташкилотлари эса тинч аҳолига ёрдам бермоқда, деб ёзади WSJ. Украиналик шифокорларнинг айтишича, ҳозир соғлиқни сақлаш тизимига юк ҳаддан ошиб кетган, айрим беморлар протез учун бир йилдан кўпроқ кутишга мажбур бўлмоқда.
Изоҳ (0)