Ўзбекистоннинг Кобулдаги элчиси Ёдгорхўжа Шодмонов Афғонистон Миллий телевидениесига берган интервьюсида “Толибон” ҳукумати эришган ютуқларни санади.
Ёдгорхўжа Шодмоновга кўра, ҳеч бир давлат “Толибон” ҳукуматини тан олмаганига қарамай, Ўзбекистон Афғонистон билан дўстлик, яхши қўшничилик алоқаларини давом эттирмоқда. Дипломат “Толибон” ҳукумати эришган ютуқларни ижобий баҳолади.
Шодмонов биринчи ютуқ иқтисодий соҳада кўзга ташланганини билдирди. Жумладан, ички харажатлар ҳисобидан Афғонистон бюджети шакллантирилди. Авваллари 70 фоиз харажатлар хорижий давлатлар ҳисобидан таъминланган бўлса, ҳозирда вазият ўзгарди.
Шодмонов иккинчи ютуқ савдо айланмаси экани, Афғонистондан экспорт ошаётганини қайд этди.
“Савдо айланмаси ҳажмининг ошиб бораётганини катта бир ютуқ деб ҳисоблайман. Учинчиси, ҳукумат вакиллари айтиши бўйича, коррупция масаласи. Коррупция камайгани борасида жуда кўп фикрлар айтилмоқда.
Охирги бир йил кўрсаткичларига қараса, бугунги кунда Афғонистоннинг четга чиқараётган моллари кўпайиб, экспорт ҳам ошиб боряпти. Буни ҳам катта бир ютуқ деб ҳисоблайман. Тўртинчиси, мамлакатда бугунги кунда хавфсизликни таъминлаш борасида тегишли вазирликлар томонидан амалга оширилаётган ишлардир”, — дейди Ўзбекистон элчиси.
Шунингдек, дипломат “Толибон” гиёҳвандларни мажбуран даволашини, гиёҳванд моддалар экишга қўйилган тақиқни ижобий баҳолади. У бу ишларда “Толибон” етакчисининг буйруғи ижобий таъсир кўрсатганини айтди.
Ўзбекистоннинг Кобулдаги элчиси ҳозирда Термиз шаҳри ва Ўзбекистоннинг бошқа шаҳарларида 1091 нафар афғон тадбиркорлари тадбиркорлик билан шуғулланаётганини айтди. Унинг сўзларига кўра, Ўзбекистон илмий, маданий ва иқтисодий соҳаларда Афғонистон билан ҳамкорлик қилади.
Изоҳ (0)