Қозоғистон ва Ўзбекистон давлат чегарасини демаркация қилиш ишларини муваффақиятли якунлади. Бу ҳақда Қозоғистон Ташқи ишлар вазирлиги расмий вакили Айбек Смадияровга таяниб, Tengrinews хабар берди.
“Шартнома 2022 йил 22 декабрь куни Тошкентда икки давлат раҳбарлари томонидан имзоланган ва икки давлат парламентлари томонидан ратификация қилинган. Мазкур келишувнинг кучга кириши Қозоғистон ва Ўзбекистон ўртасидаги 19 йиллик давлат чегарасини демаркация қилиш жараёни тўлиқ якунланганини билдиради.
2357 километрлик чегара 1301 та чегара белгиси билан белгиланган ва саккиз мингдан ортиқ саҳифадан иборат бир демаркация ҳужжатида акс эттирилган”, — деди Смадияров.
2022 йилда Қозоғистон ва Ўзбекистон давлат чегарасини демаркация қилиш бўйича келишув лойиҳасини келишиб олди.
30 июнь куни Шавкат Мирзиёев томонидан имзоланган қонун билан Ўзбекистон билан Қозоғистон ўртасида Ўзбекистон—Қозоғистон давлат чегарасини демаркация қилиш тўғрисидаги шартнома ратификация қилинганди.
Сенатнинг 23 июнь куни бўлиб ўтган қирқ иккинчи ялпи мажлисида ушбу қонун кўриб чиқилиб, маъқулланганди.
Муҳокама чоғида ҳужжат Шавкат Мирзиёев ва Қосим-Жўмарт Тўқаев томонидан унинг 2022 йил 21 декабрь куни Ўзбекистонга давлат ташрифи чоғида имзолангани билан алоҳида аҳамиятга эга экани алоҳида таъкидланганди.
Шартнома ратификация қилиниши икки давлат ўртасидаги кўп қиррали ҳамкорлик алоқаларини янада мустаҳкамлаш ҳамда кенгайтиришга хизмат қилиши қайд этилганди.
Изоҳ (0)