Ўзбекистон президентининг “Оториноларингология хизматини такомиллаштириш ва унинг кўламини кенгайтириш чора-тадбирлари тўғрисида”ги қарори қабул қилинди.
Унга кўра 2023 йил 1 сентябрдан юридик шахс мақомига эга бўлган Республика ихтисослаштирилган оториноларингология ва бош-бўйин касалликлари илмий-амалий тиббиёт маркази ташкил этилади.
Марказ оториноларингология йўналишидаги ишларни мувофиқлаштиради ҳамда “Марказ – ҳудудий тиббиёт муассасалари — туман (шаҳар) тиббиёт муассасалари” тизими асосида ўз фаолиятини ташкил этади. Оториноларингологик ва бош-бўйин касалликлари соҳасида ихтисослаштирилган тиббий ёрдам кўрсатишни йўлга қўяди, ушбу йўналишларда мутахассисларни ўқитиш ва уларнинг кўникмаларини ривожлантириш чораларини кўради ҳамда илмий мактабни шакллантиради. Ҳудудларда оториноларингологик ва бош-бўйин касалликларини ташхислаш ва даволашнинг замонавий усулларини амалиётга жорий этади.
2024/2025-ўқув йилидан бошлаб марказда оториноларингология ихтисослиги бўйича тиббиёт кадрларини клиник ординатура орқали тайёрлаш ташкил қилинади.
Марказ фаолияти давлат бюджетидан ажратиладиган маблағлар, илмий фаолиятга оид давлат дастурларини амалга ошириш доирасидаги грантлар, пуллик хизматлар кўрсатишдан тушадиган маблағлар ҳисобидан молиялаштирилади.
2024 йил 1 январдан бошлаб оториноларингология ва юз-жағ жарроҳлиги йўналишларидаги тиббий хизматлар имтиёзли тоифага кирувчи шахсларга давлат бюджети маблағлари ҳисобидан нодавлат тиббиёт ташкилотлари томонидан кўрсатилишига рухсат берилади.
Корея Эксимбанки Иқтисодий ривожланиш ва ҳамкорлик жамғармаси ҳисобидан 2023–2024 йилларда туман (шаҳар) кўп тармоқли марказий поликлиникаларини, Қорақалпоғистон ва вилоятлар кўп тармоқли тиббиёт марказлари, Қорақалпоғистон ва вилоятлар болалар кўп тармоқли тиббиёт марказлари, Тошкент шаҳар шифохоналарининг оториноларингология бўлимлари ва тиббиёт олий таълим муассасалари клиникаларини, Республика шошилинч тиббий ёрдам илмий маркази ва унинг ҳудудий филиалларини зарур тиббий ускуналар билан жиҳозлаш учун 17 миллион доллар йўналтирилади.
Изоҳ (0)