Тошкентнинг айрим ҳудудларида 2 август куни электр энергияси таъминоти вақтинча тўхтатилади. Бу ҳақда “Ҳудудий электр тармоқлари” АЖ Тошкент шаҳар филиали ахборот хизмати хабар берди.
Унга кўра, истеъмолчиларга сифатли ва барқарор электр энергияси етказиб берилишини таъминлаш ва электр тармоқларидаги авариявий ҳолатларнинг олдини олиш, куз-қиш мавсумига пухта тайёргарлик кўриш мақсадида эртага, 2 август куни қуйидаги манзилларда электр таъминоти вақтинча ўчирилади:
- Яккасарой тумани: “Тўқимачи” МФЙнинг айрим кўчаларида соат 09:00 дан 16:00 гача;
- Яшнобод тумани: “Ибрат” МФЙнинг айрим кўчаларида соат 10:00 дан 15:00 гача.
Шунингдек, Сергели ва Яшнобод туманларининг баъзи маҳаллаларида вақтинча газ таъминоти тўхтатилади. Маълум қилинишича, Сергели тумани “Юқори Дархон” МФЙдаги Наврўз ва Дилхуш кўчаларидан ҳамда Яшнобод тумани “Миришкор” ҳамда “Олмос” маҳаллалари чегара ҳудудидан ўтган ўрта босимли газ қувурларини тартибга солиш ишлари олиб борилади. Шу муносабат билан мазкур маҳаллаларда соат 10:00 дан 18:00 гача газ таъминоти узилади.
Бундан ташқари, Иситиш магистралидаги бузилишларни бартараф этиш мақсадида Шевченко кўчасида авариявий таъмирлаш ишлари олиб борилиши муносабати билан бугун, 2 август куни қуйидаги манзилларда иссиқ сув таъминоти тўхтатилди:
- Миробод тумани: “Госпитальний” массиви, С.Барака, Нукус, Шаҳрисабз, Шевченко, Ойбек, С.Азимов, Чехов, Чимкент, Авлиё ота, Афросиёб кўчалари;
- Яшнобод тумани: С. Азимов, Гоголь, Истиқлол, Истиқбол кўчалари;
- Юнусобод тумани: Зарафшон кўчаси бўйлаб 3 та маъмурий бино.
Авариявий ишлар соат 19:00 га қадар якунланишига қараб бугун иссиқ сув таъминотини тиклаш босқичма-босқич амалга оширилади. Veolia Energy Tashkent МЧЖ ХК вақтинчалик ноқулайликлар учун олдиндан узр сўрайди.
Июль охирларида Яшнобод, Олмазор, Миробод, Яккасарой, Шайхонтоҳур, Чилонзор ва Сергели туманларининг баъзи ҳудудларида юклама сабаб электр энергияси таъминотига вақтинча чекловлар киритилган эди.
Изоҳ (0)