1 август куни Олий Мажлис Сенати кенгашининг навбатдаги мажлиси бўлиб ўтди. Уни Сенат раиси Танзила Норбоева олиб борди. Бу ҳақда парламент юқори палатаси матбуот хизмати хабар берди.
Мажлисда Сенатнинг қирқ учинчи ялпи мажлисини 4 август куни чақириш тўғрисида қарор қабул қилинган. Қайд этилишича, видеоконференсалоқа тизимидан фойдаланган ҳолда ўтказиладиган мазкур ялпи мажлисда қатор қонунлар ҳамда масалаларни муҳокама қилиш режалаштирилган.
Хусусан, “Гидротехника иншоотларининг хавфсизлиги тўғрисида”ги, “Суд қарорларининг қонунийлиги, асослилиги ва адолатлилигини текшириш институти такомиллаштирилиши муносабати билан Ўзбекистон Республикасининг Жиноят-процессуал кодексига ўзгартириш ва қўшимчалар киритиш тўғрисида”ги, “Ўзбекистон Республикасининг айрим қонун ҳужжатларига крипто-активлар айланмаси соҳасида лицензиялаш ва рухсат бериш тартиб-таомиллари тизимини такомиллаштиришга қаратилган қўшимча ва ўзгартиришлар киритиш тўғрисида”ги қонунлар шулар жумласидан.
Шунингдек, “Адвокатура тўғрисида”ги Ўзбекистон Республикаси Қонунининг 31-моддасига ўзгартириш киритиш ҳақида”ги, “Волонтёрлик фаолияти тўғрисида”ги Ўзбекистон Республикаси Қонунига ўзгартириш ва қўшимчалар киритиш ҳақида”ги, “Ҳайвонот дунёсини муҳофаза қилиш ва ундан фойдаланиш тўғрисида”ги Ўзбекистон Республикаси Қонунининг 43-моддасига қўшимча ва ўзгартириш киритиш ҳақида”ги, “‘Ветеринария тўғрисида’ги Ўзбекистон Республикаси Қонунига ўзгартиришлар киритиш ҳақида”ги қонунларни кўриб чиқиш режалаштирилмоқда.
Бундан ташқари, дарёлар ўзанларини тозалаш ва қирғоқларини мустаҳкамлаш, норуда фойдали қазилмаларни қазиб олишнинг атроф-муҳит, сув ва йўл хўжалиги объектларига салбий таъсири юзасидан Вазирлар Маҳкамасига юборилган парламент сўрови натижалари муҳокама қилинади.
Олий Мажлис Сенатининг бундан олдинги ялпи мажлиси 22 июнь куни чақирилганди. “Норматив-ҳуқуқий ҳужжатларнинг ва улар лойиҳаларининг коррупцияга қарши экспертизаси тўғрисида”ги, “‘Давлат божи тўғрисида’ги Ўзбекистон Республикаси қонунига ўзгартиш ва қўшимчалар киритиш ҳақида”ги қонунларга ўзгартириш киритиш масалалари кўриб чиқилган.
Изоҳ (0)