Кишинёв полицияси Россиянинг Молдовадаги элчихонаси дарвозасига бориб урилган Mercedes русумли автомашина ҳайдовчисини қўлга олди. Бу ҳақда республика Ички ишлар вазирлиги хабар бермоқда.
Полиция маълумотларига кўра, ҳайдовчи дипломатик миссия дарвозасини уриб, шикастлаган, шундан сўнг у воқеа жойидан қочишга уринган. Полиция машинани Страшени шаҳрига кетаётганда топди. Полициянинг тўхташ ҳақидаги талабларига қарамай, ҳайдовчи ҳаракатни давом эттириб, йўлда яна иккита машинани уриб юборган. Охир-оқибат полиция Страшени туманида машинани мажбуран тўхтатган.
Полиция ҳеч ким жабрланмаганини айтди.
Россия элчихонаси ҳозирча воқеа юзасидан изоҳ бермади.
Молдова — Россия муносабатлари
2023 йил февралида Молдова ҳукумати мамлакатда давлат тўнтаришига тайёргарлик кўрилаётганини, ҳарбий тайёргарликдан ўтган диверсантлар тез орада ҳукумат биноларига ҳужум қилиб, одамларни гаровга олиши мумкинлигини маълум қилди. Украина президенти Владимир Зеленский Украина разведкаси “Россиянинг Молдовадаги сиёсий вазиятни йўқ қилиш режасини” барбод қилганини айтди. Шундан сўнг мамлакатда митинглар бўлиб ўтди, аммо вазиятнинг кескинлашуви кузатилмади.
Июль ойида Молдова ҳукумати Россиянинг “кўплаб душманона ҳаракатлари”га жавобан Россиянинг Кишинёвдаги элчихонаси ходимларидан ўн нафар дипломат ва 15 нафар техник ходимни қисқартиришга қарор қилди.
Изоҳ (0)