“Камбағални истеъмол қилаётган нарсасидан аниқлаш керак эмас” — Беҳзод Мусаев

Камбағалликни қисқартириш ва бандлик вазирлиги бугунги кунда 1 миллион 307 минг 800 нафар камбағал оила мавжудлиги ҳақида хабар тарқатган эди. Статистика агентлигига кўра, Ўзбекистонда 2023 йил учун ҳисобланган минимал истеъмол харажатлари қиймати бир ойда киши бошига 568 минг сўмни ташкил этган.

Камбағалликни қисқартириш ва бандлик вазири Беҳзод Мусаевнинг “Дарё”га маълум қилишича, камбағаллик йўқ эмас, уни ҳукумат тан олиб турибди.

“Ҳозир камбағаллик кўрсатгичи республикада 14 фоизга камайди. Камбағалликни аниқлаш критерийлари устида доимий ишлаб боряпмиз. Камбағални истеъмол қилаётган нарсасидан аниқлаш керак эмас, аксинча унинг турмуш даражаси, кийиниши, болаларига таълим бериши, соғлиқни сақлаш каби харажатларини ҳисобга олгандан кейин камбағалликни аниқлаш ва кейин камбағалликдан чиқариш лозим”, — деди вазир.

Унинг қўшимча қилишича, жорий йилги камбағаллик кўрсатгичини 14 фоиздан 12 фоизга тушириш режалаштирилган.

“Ундан кейинги йилда эса 10 фоизга тушириш режалаштирилган. Буни дарров тушириб бўлмайди. Бу осон иш эмас. Лекин уларни аниқлаб, улар билан мақсадли, манзилли ишлагандан сўнг камбағалликдан чиқариш дастурлари бўлади”, — деди Беҳзод Мусаев.

Камбағалликни қисқартириш ва бандлик вазирлиги “Дарё” мухбирининг камбағалнинг ўзи ким ва у қандай кўрсатгичлар бўйича аниқланади, деган саволига жавоб бермади.

Вазирликнинг маълум қилишича, 2023 йилнинг декабрь ойига келиб, 130 мингга яқин оила, яъни 1 миллион аҳоли камбағалликдан чиқарилиши кутилмоқда.

Муҳокамада камбағаллик

Депутат Алишер Қодиров Twitter’даги саҳифасида ёзган “ҳаракати, илми, ҳунари йўқ одам камбағал бўлиши” ҳақидаги твит муҳокамаларга сабаб бўлди.

Алишер Қодировнинг фикрича, камбағаллик мағлубиятга розиликни англатади.

“Ўзбекистонда камбағаллик йўқ деб узоқ йиллар ўзимизни алдаб келдик. 7 йил аввал, халқаро мезонларга кўра Ўзбекистонда 34 фоиз аҳоли камбағал эди, 2023 йилда бу кўрсаткич 14 фоизгача қисқарибди. Халқаро мезонлар ўз йўлига, камбағаллик – мағлубиятга розилик, деб ўйлайман.

Ким камбағал бўлади? Биринчи навбатда ҳаракати йўқ, илми йўқ, ҳунари йўқ одам камбағал бўлади! Кимдир ҳаёти давомида имкон изласа, кимдир айбдор излайди. Менимча, давлат қанча ҳаракат қилмасин, мағлублар камбағал бўлиб қолаверади”, — деб ёзган у.

Иқтисодчи Отабек Бакиров депутат фикрига муносабат билдириб, инсон ўзига боғлиқ бўлмаган ҳолларда ҳам камбағал бўлиши мумкинлигига ишора қилди.

“Одам ўзига боғлиқ бўлмаган равишда отадан, онадан, боқувчидан ажралиб қолиши, ногирон ё чекланган имкониятлар билан туғилиши, ногирон ё касал бўлиб қолиши мумкин, жаноб Қодиров. Узр, чидаб туролмадим. Мен мамлакат бойликларини бир тўп тўда эгаллаб олиб, миллионлаб одамларни қашшоқлаштираётгани, бюджетни ўз фойдасига тақсимлаб, мактабни, тиббиётни хароб қилиш орқали авлоддан авлодга ўтадиган қашшоқлаштиришни бойлик тўплаш воситасига айлантирилганини гапирмаяпман”, — деб ёзди иқтисодчи.

Депутат Дониёр Ғаниев ҳам Алишер Қодиров фикрларига ўз муносабатини билдирди.

Тўғри, илми, ҳунари йўқ, дангаса одам камбағал бўлиши мумкин. Лекин бу ҳамма камбағал шундай дегани эмас. Худди аҳмоқ одамлар ҳам депутат бўлиши мумкин, лекин бу ҳамма депутат аҳмоқлигини англатмагандек. Нобел совриндорлари А.Банержее ва Э.Дуфлонинг (Poor Economics) фикрича, одамлар меҳнат қилмагани учун эмас, балки кўп ҳолларда “камбағаллик қопқонига” (очлик, касаллик, ишсизлик, таълим ололмаслик)га тушиб қолиши ортидан қашшоқликдан чиқолмайди, — дея фикр билдирган депутат.

Блогер Зафарбек Солижонов Дониёр Ғаниевнинг Twitterъдаги фикрлари акс этган скриншотни Telegram’даги каналида жойлаб: “Дониёр Ғаниев менинг депутатим ва фахрим”, — дея пост қолдирди.