Бухоро вилояти Шофиркон туманида фуқарони тиббиёт техникумига ўқишга киритиб қўйиш эвазига пора талаб қилган шахслар қўлга олинди. Бу ҳақда вилояти ИИБ ахборот хизмати хабар берди.
Қайд этилишича, Бухоро вилояти ИИБ ҳамда департаментнинг Когон шаҳар, Шофиркон ва Вобкент туманлари бўлимлари ходимлари ҳамкорлигида тезкор тадбир ўтказилган. Тадбирда Ғиждувон тумани “Чағдари” маҳалласида яшовчи 48 ёшли С.Г. исмли аёл 27 ёшли А.Б. исмли эркак билан биргаликда бошқа бир шофирконлик фуқарони Ғиждувон туманидаги Абу Али ибн Сино номли жамоат саломатлик техникумига ваколатли танишлари орқали ўқишга киритиб қўйишни ваъда қилгани аниқланган.
Улар Шофиркон тумани буюм бозори олдида ўзининг бошқарувида бўлган Cobalt русумли автомашина ичида 1 000 АҚШ долларини пора тариқасида беришга далолат қилиб, ушбу пулларни олган вақтида далилий ашёлар билан қўлга олинган.
Мазкур ҳолат юзасидан фуқаролар С.Г. ва А.Б.га нисбатан Жиноят кодексининг 168-моддаси (фирибгарлик) 2-қисми билан жиноят иши қўзғатилиб, дастлабки тергов ҳаракатлари олиб борилмоқда.
Аввалроқ, Фарғона, Андижон, Гулистон давлат университетлари ва “Нархоз”га ўқишга киритиб қўйиш эвазига пул олган шахслар ушлангани хабар қилинганди. Шунингдек, Андижонда ўқишга киритишни ваъда қилиб, 4 минг доллар олган ОТМ ходими қўлга олинган эди.
Изоҳ (0)