Хорватия Украинани миналардан тозалаш учун 1 миллион евро миқдорида маблағ ажратди. Маблағлар Бирлашган Миллатлар Ташкилотининг Жаҳон озиқ-овқат дастурига йўналтирилади, дея хабар қилди Украина иқтисодиёт вазири Юлия Свириденко.
Ушбу молиявий ёрдамнинг асосий мақсади урушдан энг кўп зарар кўрган ҳудудларда фермерлар ва озиқ-овқат ишлаб чиқарувчиларига ишни тиклашга ёрдам беришдир.
“Бу кичик фермерларни қўллаб-қувватлаш мақсадида март ойида бошланган дастур. Дастур доирасида асосан 300 гектардан кам ерга эга бўлганлар ёки ўзи учун озиқ-овқат етиштираётган оилалар қамраб олинади”, — дейилади хабарда.
Аввалроқ Бирлашган Миллатлар Ташкилоти бош котиби ўринбосари Розмари Дикарло Украина ҳудудининг деярли учдан бир қисми портламаган ўқ-дорилар ва миналар билан қопланганини маълум қилганди. Урушнинг бу қолдиқлари тинч аҳоли учун доимий хавф туғдиради ва буни тозалашга узоқ йиллар кетади, дея огоҳлантирди у.
Яқинда Свириденко Украина иттифоқчилари мамлакатни миналардан тозалаш ишлари учун қўшимча молиявий ёрдам беришга келишиб олгани ҳақида хабар қилганди. Умуман олганда, муаммони ҳал қилиш учун Украинага деярли чорак миллиард доллар керак бўлади.
Изоҳ (0)