Хонанда Тейлор Свифтнинг Сиэтлдаги Тhe Eras Tour концерти чоғида мухлислар фаоллиги туфайли 2,3 магнитудали зилзилага тенг сейсмик фаоллик қайд этилди. Бу ҳақда Ғарбий Вашингтон университети геология профессори, сейсмолог Жеки Каплан Ауэрбах хабар берди, деб ёзмоқда “Правила жизни” нашри.
Сейсмологнинг сўзларига кўра, 2011 йилда маҳаллий футбол жамоасининг ўйинида мухлислар ғалабадан хурсанд бўлганида шунга ўхшаш воқеа содир бўлган.
“Мен иккала ҳодисанинг маълумотларини тўпладим ва бу деярли бир хил сигналлар тўплами эканини дарҳол пайқадим”, — дейди олим. Унинг қўшимча қилишича, магнитудадаги фарқ 0,3 баллни ташкил этади, бироқ Свифтнинг мухлислари футбол мухлисларига қараганда анча фаол бўлган.
“Асосий фарқ — силкинишнинг давомийлиги. Турдан кейинги қарсаклар бир неча сония давом этган, охир-оқибат сусайган. Мен Тейлор Свифтнинг концертидан тахминан 10 соатлик маълумот тўпладим. Мусиқа, динамика, ритм. Бу энергиянинг барчаси ерни тешиб, уни силкитиши мумкин”, — дейди Каплан Ауэрбах.
Свифтнинг Сиэтлдаги концертларидан бирига ташриф буюрган CNN мухбири ҳам ўз фикрлари билан ўртоқлашган.
“Тейлорнинг Сиэтлдаги концерти унутилмас таассурот қолдирди. Сиз том маънода ернинг титраётганини ҳис қилишингиз мумкин эди. Қулоқларимда шовқин борлигини ҳали ҳам ҳис қиляпман”, — дейди журналист.
Свифтнинг ўзи ижтимоий тармоқлардаги сўнгги постларидан бирида мухлисларнинг фаоллигини қайд этиб, томошабинларга “барча олқишлар, қичқириқлар, сакрашлар, рақсга тушиш ва қўшиқ куйлагани” учун миннатдорчилик билдирди.
Изоҳ (0)