“Ўзбекистон темир йўллари” АЖ ва Италиянинг Arsenale Group компанияси ўртасида учрашув бўлиб ўтди, унда ҳамкорликнинг муҳим масалалари ва умумий лойиҳаларни амалга ошириш муҳокама қилинди.
Музокаралар давомида Италия компаниясининг Luxury touristic train номли янги туристик поезди тақдимоти ўтказилди. Ушбу поезд саёҳатчилар учун ҳашамат ва қулайликни тақдим этади. Поездни Тошкент—Самарқанд—Бухоро—Хива—Тошкент йўналишида йўлга қўйиш таклиф қилинмоқда.
Учрашувда томонлар қўшма корхона ташкил этиш, йўналишлар ва жадвалларни ишлаб чиқиш, шунингдек, лойиҳа бўйича амалий ишларни бошлашни назарда тутувчи ҳамкорлик шартномасини муҳокама қилишга тайёрлигини билдирди.
— Хабарингиз бор, ўтган ойда президент Шавкат Мирзиёев Италияга ташриф буюриб, ишбилармон доиралар вакиллари билан учрашув ўтказди, — дейди “Ўзбекистон темир йўллари” акциядорлик жамияти бошқаруви раисининг биринчи ўринбосари Ҳикматулла Рахметов. — Хусусан, Италиянинг Arsenale Group компанияси ҳам ушбу йиғилишда иштирок этди. Июнь ойидаги музокаралар натижасида бугун ушбу компания бизга ҳамкорлик қилиш таклифи билан келди. Унинг бош директори П.Барлетта Европадан Ўзбекистон орқали Хитойга сайёҳлик поездини йўлга қўйишни таклиф қилди. Мен бу лойиҳанинг амалга оширилишини муҳим қадам деб биламан, чунки темир йўллар тарихида бундай нарса бўлмаган. Шунингдек, Италия томонидан “Ўзбекистон темир йўллари” АЖ билан қўшма корхона ташкил этиш таклифи олинди. Белгиланган барча мақсадларни амалга ошириш натижаларидан келиб чиқиб, Европадан Кавказ, Россия, Ўзбекистон орқали Хитойга тезюрар сайёҳлик поезди қатновини йўлга қўйиш режалаштирилмоқда.
Учрашув якунида италиялик меҳмонлар “Ўзбекистон темир йўллари” АЖ инфратузилмаси ва вагон парки билан яқиндан танишиш мақсадида “Тошкент марказий” вокзалига ва “Тошкент йўловчи вагонларини қуриш ва таъмирлаш заводи” АЖга боришди.
Изоҳ (0)