Ўзбекистонда Хитой компаниялари билан ҳамкорликда интелектуал транспорт тизими йўлга қўйилади, деб хабар бермоқда Транспорт вазирлиги матбуот хизмати.
Маълум қилинишича, жамоат транспорти соҳасида замонавий илғор рақамли технологияларни жорий этиш тажрибасини ўрганиш мақсадида Транспорт вазирлиги ҳамда “Тошшаҳартрансхизмат” АЖ вакилларидан иборат делегация 19—26 июль кунлари Хитойда хизмат сафарида бўлди.
Хизмат сафари давомида Yutong Bus Cо., Ltd, King long, Magnetic North, Hikvision компанияларига ташриф амалга оширилди ва компанияларнинг ишлаб чиқариш жараёнлари билан яқиндан танишилди. Шунингдек, бир қатор йўналишларда ҳамкорлик қилиш масалалари юзасидан музокаралар ўтказилди.
Хусусан, Yutong Bus Cо., Ltd компанияси билан иқтисодий ҳамкорликни мустаҳкамлаш ва алоқаларни янада кенгайтириш мақсадида уч томонлама меморандум имзоланди. Шу билан бирга, томонлар ҳайдовчисиз ҳаракатланадиган автоном транспорт воситалари соҳасида ўзаро ҳамкорликда лойиҳаларни амалга оширишга келишиб олди.
Hikvision компанияси вакиллари билан бўлиб ўтган музокаралар якунига кўра, инновацион видеокузатув тизимлари ва сунъий интеллект технологиясига асосланган интеграциялашган хавфсизлик ечимларини тақдим этиш бўйича “Тошшаҳартрансхизмат” АЖ билан икки томонлама меморандум имзоланди.
Magnetic North компанияси билан ақлли транспорт тизимини йўлга қўйиш масалаларида ҳамкорликда ишлашга келишиб олинди. Хусусан, компания билан Ўзбекистоннинг интеллектуал транспорти бўйича тўлиқ ечимларни тақдим этиш, жумладан, ишлаб чиқиш, лойиҳалаш, ўрнатиш, ишга тушириш, ўқитиш, техник хизмат кўрсатиш ва такомиллаштириш бўйича икки томонлама меморандум имзоланди.
Изоҳ (0)