Самарқанд вилоятининг Ургут туманида археологик ёдгорликларига зарар етказилгани аниқланиб, жиноят иши қўзғатилди. Бу ҳақда Бош прокуратура матбуот хизмати хабар берди.
Прокуратура органлари томонидан тарихий ёдгорликларни муҳофаза қилиш ва сақлашга қаратилган назорат тадбирларининг бирида Ургут тумани “Мингтепа” маҳалласида жойлашган “Тўлқиртепа-1” археология ёдгорлигининг 163 кубометр ҳажмдаги ер майдони махсус техника ёрдамида кавлаб олиниб, тарихий объектга 4 миллиард сўм зарар етказилгани аниқланган.
Шунингдек, ушбу туманнинг “Қуйиқишлоқ” маҳалласида жойлашган ўрта асрларга оид “Тешиктепа”, “Деҳқонобод” маҳалласидаги “Қулқишлоқтепа-2” ва “Огаҳий” маҳалласидаги “Мозортепа” археология объектлари қисман бузилиши оқибатида жами 5 миллиард сўм зарар етказилган.
Текширишлар натижасига кўра жиноят ишлари қўзғатилиб, тергов ҳаракатлари олиб борилмоқда. Мазкур жиноий қилмишлар қонунчиликка асосан оғир жиноят ҳисобланиб, айбдор шахсларга нисбатан 7 йилгача озодликдан маҳрум қилиш жазоси қўлланилади.
Изоҳ (0)