АҚШ Сенати 2024 йил учун рекорд даражадаги 886 миллиард долларлик миллий мудофаани молиялаштириш тўғрисидаги қонунни маъқуллади. Бу ҳақда Америка овози хабар берди.
Қонун маъқуллангач, Конгресснинг ҳар икки палатаси муроса топиши ва ҳужжат версиясини келишиб олиши керак.
“Ушбу қонун лойиҳаси Хитой ва Россия каби рақибларга қарши рақобатимизни биринчи ўринга қўйиш учун энг катта имкониятдир. Бу бизнинг Байден маъмурияти диққатини Американинг ҳарбий-саноат базасини тиклаш каби муҳим масалаларга қаратишимиз учун имконият”, — деди Сенатдаги озчилик раҳбари Митч МакКоннелл.
Қонун лойиҳаси, шунингдек, Украина учун 300 миллион доллар ажратиш ва бир қанча муҳим бандларни ўз ичига олади, масалан, сунъий интеллект ва яримўтказгичлар каби Хитойнинг айрим корхоналарига АҚШ сармоясини чеклаш ва ҳарбийларнинг маошларини 5,2 фоизга ошириш.
Шу билан бирга, Сенат икки партия томонидан қўллаб-қувватланган бир нечта таклифларни рад этди. Улар қаторидан демократ сенатор Эми Клобучарнинг “Толибон” ҳукмронлигидан сўнг АҚШга кўчиб келган 80 минг афғонга яшаш рухсатнома тақдим этиш жой олган.
Бундан ташқари республикачиларнинг Украинага ёрдам кўрсатиш бўйича бош инспектор лавозимини яратишга уриниши маъқулланмаган. Ёрдам бериш билан шуғулланадиган инспекторларнинг лавозимлари аллақачон маълум давлат идораларида мавжуд.
Изоҳ (0)