Президент мактабига ҳужжат топширганлар яна иккита мактабга ҳужжат топшириши мумкин

Ўзбекистонда 2023/2024-ўқув йилида Ихтисослаштирилган таълим муассасалари агентлиги тизимидаги Президент мактабларига ҳужжат топширган талабгорларга ўзлари танлаган мактабдан ташқари яна иккита мактабга ҳужжат топширишлари учун имконият яратилди.

Яъни, талабгор Президент мактабларига ҳужжат топшириш билан бирга, таянч ихтисослаштирилган мактабларга ва ўз ҳудудидаги ихтисослаштирилган мактаб ва мактаб интернатларининг кириш имтиҳонларига қатнашишлари мумкин.

Ихтисослаштирилган мактаб ва мактаб-интернатларида ўқувчилар учун мактабда қуйидаги шароитлар яратилган:

• замонавий ётоқхона билан таъминланади;
• ётоқхонада қоладиган ўқувчилар 1 кунда 5 маҳал бепул овқатланишади;
• дарсдан сўнг тўгарак машғулотларига жалб қилинади;
• турли хил спорт турлари билан шуғулланишади;
• ўқувчиларга сунъий интеллект, робототехника, IELTS, TOEFL ва SAT бўйича қўшимча курслар ташкил этилади;
• 10- ва 11-синф ўқувчиларининг амалиёти яқин ҳудудлардаги ишлаб чиқариш ва хизмат кўрсатиш ташкилотларида ўтказилади.

Шунингдек, Президент мактабларининг кириш имтиҳонлари 2-босқичида иштирок этиб, ўқишга кира олмаган талабгорлар ҳужжат топшириш жараёнида ўз ҳудудидаги ўзлари танлаган ихтисослаштирилган мактаблардан бирида ўқиш истагини билдирган тақдирда квотанинг 50 фоизи доирасида баллар кетма-кетлиги асосида имтиҳонсиз мазкур ихтисослаштирилган мактабларга қабул қилиниши мумкин.

Ихтисослаштирилган мактаблар ҳақида

2022 йил 14 апрель куни президентнинг “Президент таълим муассасалари агентлиги тизимидаги ихтисослаштирилган мактаблар тармоғини кенгайтириш тўғрисида”ги фармони имзоланган. Унга кўра, 2023 йил 1 июнга қадар фаолияти тугатилган Меҳрибонлик уйлари ва Болалар шаҳарчалари негизида 5 та ихтисослаштирилган мактаб-интернати ҳамда 3 та ихтисослаштирилган мактаби; 2022—2024 йилларда Президент таълим муассасалар агентлиги тизимида 25 та ихтисослаштирилган мактаб-интернатлари қуриш ҳамда келгусида янги ихтисослаштирилган мактаб-интернатлар ва ихтисослаштирилган мактабларни фақат агентлик тизимида ташкил этиш каби вазифалар белгилаб берилган.