Россияда 2023 йилнинг биринчи ярим йиллигида 205 мингдан ортиқ хорижлик мамлакат фуқаролигини олди. Бу ҳақда Россия ИИВ расмий статистикасида сўз боради.
Қайд этилишича, фуқаролик олганлар сони 2022 йилнинг мос даврига нисбатан 382 минг кишига камайган.
Россия фуқаролигини олишда тожикистонликлар етакчилик қилмоқда — 87 мингга яқин. Иккинчи ўринда Украина — 39 минг, учинчи ўринда Арманистон — 18 мингга яқин.
Ундан кейинги поғоналарда Қозоғистон (13 876), Қирғизистон (10 500), Ўзбекистон (9 340), Озарбайжон (7 457).
Январь ўрталарида Россия Тергов қўмитаси раҳбари Александр Бастрикин охирги беш йил ичида Марказий Осиё ва Кавказ давлатларидан келган миллиондан ортиқ киши, жумладан, Тожикистон, Ўзбекистон ва Қирғизистондан 550 минг киши Россия фуқаролигини олганини айтганди.
“2022 йилнинг биринчи ярмида юқорида кўрсатилган давлатларнинг 60 мингдан ортиқ вояга етган фуқаролари Россия фуқаролигини олди. Шунинг учун улар мамлакатни ҳимоя қилишнинг конституциявий мажбуриятини ҳам олган. Шу муносабат билан, фуқароликка қабул қилинган шахсларнинг махсус ҳарбий операция вазифаларини амалга оширишда иштирок этиши масаласини кўриб чиқиш мақсадга мувофиқдир”, — деганди у.
Кўп ўтмай Россияга ишлашга келиб, кейинчалик Россия фуқаролигини олган Марказий Осиё мамлакатлари фуқаролари Россияни тарк этиб, уйга қайтиб кета олмаслиги, чунки уларга нисбатан сафарбарлик тўғрисидаги қонунлар амал қилиши маълум бўлганди.
Изоҳ (0)