Ижтимоий тармоқларда Ўзбекистон аҳолиси ўртасида коронавирус яна фаоллашиб қолгани ҳақида хабарлар тарқалди. Санитария-эпидемиология қўмитаси бугунги кунда республикада ушбу инфекцияси бўйича вазият барқарор эканлигини маълум қилди.
Қайд этилишича, пандемия бошланган кундан бошлаб 2023 йилнинг 25 июль ҳолатига дунёда 692,1 миллион нафардан ортиқ беморларда коронавирус инфекцияси аниқланган ва улардан 6,9 миллион нафари (0,9 фоиз) вафот этган. Шу билан бирга, касалланиш дунё бўйлаб пасайиш тенденциясига эга, аниқланаётган беморларнинг аксариятида касаллик енгил ва ўрта шаклда ўтмоқда.
Ўзбекистонда 2023 йил 25 июль ҳолатига кўра, коронавирус билан касалланганлар сони 255 193 нафарни ташкил этиб, улардан 253 235 нафари (99 фоизи) соғайган. Бугунги кунда республикада коронавирус инфекцияси бўйича вазият барқарор.
Бироқ, коронавирус инфекцияси ва ўткир респиратор инфекцияларни микс-инфекция касаллиги сифатида, айнан эмланмаган аҳоли ҳамда сурункали касалликлари мавжуд бўлган фуқаролар ўртасида қайд этилиши кузатилмоқда.
“Касалланиш бутун дунёда чекингани билан, йўқ бўлиб кетгани йўқ, Жаҳон соғлиқни сақлаш ташкилоти бош директори томонидан 4 май куни ўтказилган йиғилишда коронавирус COVID-19 пандемиясини жамоат саломатлигига хавф солмайдиган даражадалиги эълон қилинган. Шу билан бирга касалланишдан ҳимояланиш чоралари давом эттирилиши лозимлигини таъкидлаган.
Республикада коронавирус инфекцияси устидан эпидемиологик назорат ва коронавирусга қарши эмлаш жараёни давом этмоқда”, — дейилади Санепидқўмита хабарида.
Изоҳ (0)