Россияда ўзбекистонлик ўсмир томдан қулаб, ҳалок бўлди 

Россиянинг Омск вилоятида кўп қаватли уйнинг томидан 17 ёшли ўзбекистонлик ишчи қулаб тушди. Бу ҳақда “Коммерчиские новости” хабар берди.

Йигит олган жароҳатлари туфайли шифокорлар етиб келгунига қадар вафот этган. Ҳолат юзасидан Россия Жиноят кодексининг 143-моддаси 2-қисми (меҳнатни муҳофаза қилиш талабларини бузиш, эҳтиётсизлик натижасида инсон ўлимига олиб келиш) билан жиноий иш очилган. Ҳозирда тергов ҳаракатлари давом этмоқда. 

“Тергов ҳодисанинг барча ҳолатлари ва сабабларини аниқлаш, шунингдек, таъмирлаш ишлари давомида хавфсизлик қоидаларига риоя қилиш учун масъул шахсларни аниқлаш ниятида”, — дейилади хабарда.

Жиноят ишини тергов қилишни Совет округи прокуратураси ўз зиммасига олган.

“Дастлабки маълумотларга кўра, тахминан соат 19:30 ларда 17 ёшли ўсмир уйни капитал таъмирлаш вақтида томдан қулаган. Олган тан жароҳатлари туфайли воқеа жойида вафот этган”, — дейди Омск вилояти прокуратураси.

Марҳум йигит Ўзбекистондан Омскка ишлаш учун келгани аниқланган.