Ўзбекистонда хориждан келган фуқаролардан қизамиқ касаллиги юқиш ҳолатлари аниқланмоқда. Бу ҳақда Санитария-эпидемиология қўмитаси ахборот хизмати хабар берди.
Унга кўра, Жаҳон соғлиқни сақлаш ташкилоти маълумотларига кўра эмлашдан бош тортганлар ҳисобига, 2023 йилда дунёда ва Европа минтақасида қизамиқ бўйича эпидемиологик вазият кескинлашди. Айни пайтда Украинада 23 070, Сербияда 4 954, Францияда 2 576 , Грецияда 2 476, Италияда 2 020, Россияда 1 396, Грузияда 1 128 ҳолатда қизамиқ касаллиги қайд этилган.
Қўшни мамлакатлар: Афғонистонда 2023 йилнинг ҳозиргача бўлган даврида 2 105 ҳолатда, Тожикистонда эса 300 дан ортиқ, Қозоғистонда 169 та ҳолат қайд этилган. Республикада жорий йилнинг июль ойи ҳолатига кўра, қизамиқ касаллигига шубҳа қилинган 306 нафар беморнинг қон намуналари вирусологик лабораторияга юборилган. Улардан 164 тасида қизамиқ аниқланган.
Мамлакатда қизамиқ билан касалланиш ҳолатлари асосан хориждан келган қизамиқ билан касалланганлар билан алоқада бўлган фуқаролар орасида аниқланмоқда. Ҳозирда мамлакатда қизамиқ бўйича эпидемиологик вазият назорат остида бўлиб, ушбу касалликка шубҳа қилинган шахслар билан алоқада бўлганлар эпидемиологик кўрсатма асосида профилактик эмлаш билан қамраб олинмоқда.
Қизамиқ касаллиги бўйича мураккаб эпидемик вазиятнинг олдини олиш мақсадида Ўзбекистонда 2022 йилнинг 16 ноябрь—30 декабрь кунлари 6 ойликдан 5 ёшгача бўлган болаларда қизамиқ-қизилчага қарши оммавий эмлашлар ўтказилган. Натижада режадаги 3 355 900 нафар боланинг 3 303 582 нафари ёки 98,4 фоизи эмлаш билан қамраб олинган ва ҳозирда ҳам эмлаш ишлари давом эттирилмоқда.
Изоҳ (0)