Қашқадарё вилоятининг Қарши шаҳридаги “Комилон” маҳалласи Университет кўчасида яшовчи аҳоли вакиллари ҳудуддан олти қаватли меҳмонхона қурилгани ва бу меҳмонхона деразаларининг улар яшаётган хонадон ҳовлисига қараганидан норози бўлмоқда.
Янги қурилган бинонинг 21 та деразаси ва иккита эшиги бизнинг ҳовлимизга қарагани сабаб, ҳовлимиздан ташқарига эмин-эркин кириб чиқолмаймиз. Келинларимиз бор, ёш қизларимиз бор. Қишда ҳовлимизга қуёш тегмайди. Ҳаммаси майли, аммо бино деразасининг айнан бизнинг ҳовлимизга қараши бизга ноқулайлик туғдирмоқда. Ёпиб беришсин, — дейди ҳолатдан норози бўлган хонадон эгаси Марям Кўчарова.
Унинг турмуш ўртоғи Иброҳим Ёқубов хонадони худди зоопаркдек томоша майдонига айланганидан шикоят қилмоқда.
Катта келинимиз фарзандли бўлгач, бу ердаги вағур-вуғурдан безор бўлиб, боласини ухлатолмай кетиб қолди. Соат кечаси 12 гача болгарка ишлайди, овозидан безор бўлдик. Худди зоопаркка қарагандек, 80 та кўз бизнинг ҳовлимизга қараб ўтиради. Нос туфлайди. Ҳожатхонага чиқмоқчи бўлган келинларимиз бошига лаган ёпиб ўтяпти, тош тушмасин деб. Шиферимизнинг ярми йўқ. Ҳожатхонамиз сувга тўлди, — дейди мазкур ҳолатдан норози бўлган хонадон эгаси Иброҳим Ёқубов.
Шу ҳудудда жойлашган нотураржой бино мулкдори Дилфуза Қодирова ҳам мазкур бино деразалари нотураржой объекти томон қараганидан норозилигини айтмоқда.
Бу бино деразалари нотураржой биномизнинг ҳовли томонига қараган. Мазкур ҳолат бўйича масъул ташкилотларга мурожаат қилдим. Қурилиш бошқармасидагилар ҳам бу бино қурилишидан аввал қўшнилардан розилик олиниши кераклигини, деразаси ҳовлимиз томонга қарашидан огоҳлантириб, биз билан келишиб қилиши лозимлигини айтмоқда. Бироқ, биздан бу бўйича сўралмаган, келишилмаган. Демакки, қонунга зид ҳаракат қилиняпти. Шу сабаб қурувчига мурожаат қилиб, бу ҳолатни бартараф этишини сўрадик. Аммо натижа йўқ. Бу бўйича мурожаат қилмаган жойимиз, ташкилотимиз қолмади. Қурилиш бошқармаси эса судга беришни тавсия қилмоқда, — дейди мулк эгаси.
Дилфуза Қодирова нотурар бинодан ҳовли сифатида ҳам фойдаланишини, мулкидан фойдалана олмаётганини айтмоқда.
Қурувчи олти қават эмас, хоҳласа ўн қаватли бино қурсин. Бунга эътирозимиз йўқ. Лекин бизнинг ҳовлимиз томон кўринишини чеклашларини, деразаларини ёпишларини сўраймиз. Биз ҳовлидан фойдалана олмаяпмиз. Ёз кунида ҳовлида ўтиришимиз бор, эмин-эркин юролмаймиз. Усталари қараб ўтиради, балки бирор нима ташлашлари мумкин. Хавфсизлигимиз ҳам таъминланмайди бу ҳолатда, — дейди у.
Мурожаатчининг айтишича, бу иш бўйича судга ҳам мурожаат қилинган.
Тўрт марта суд бўлди. Икки марта суд мажлисида қатнашгандим. Судья “Бизда ҳозирча ҳужжатлар етарли эмас. Биз судьямиз, қурувчи ёки мутахассис эмас, бизга архитектура қандай хулоса берса, шунга қараб хулоса қиламиз”, дейишганди. Лекин охирги судда бизни ҳам чақирмай, мурожаатимизни рад қилишган. Судга почта орқали чақирув қоғозини юбордик дейишди. Лекин юборишмаган экан. Суд бизнинг иштирокимизсиз ўтказилган ва шикоятимизни рад қилишган, — дейди Дилфуза Қодирова.
Мурожаатчиларнинг айтишича, қурувчи уларнинг ҳовлисини сотиб олишга ҳам уринган.
Қурувчи бизга даллол юбориб, сомсачиларни юбориб, уйингизга уй берайликми ёки сотиб олайликми деб, бизга деразасини ёпиб беришсин, бошқа ҳеч нарса керак эмас, — дейди Иброҳим Ёқубов.
Ўзини Отабек Муродов деб таништирган хонадон эгаси ҳам мазкур бино деразаларининг ҳовлисига қараши аёли ва онасига ноқулайлик туғдираётганини айтмоқда.
Уйда аёлим ва онам билан бирга яшаймиз. Улар эркин кириб чиқолмайди. Кечаси шовқин-сурон ҳам безовта қиляпти, — дейди Отабек Муродов.
Хонадон эгалари бинода қурилиш ишлари кетаётгани сабаб, набиралари ҳовлида эмин-эркин ўйин ўйнагани ҳам қўрқиб қолганини айтмоқда.
Қурилиш ишлари кетаётгани боис, набираларимиз ҳовлида ўйнашга қўрқади. Шуми ҳақиқат? Бизга ёрдам беринг, илтимос, — дейди фуқаро.
“Дарё” мазкур ҳолат бўйича аҳоли эътирозига сабаб бўлаётган меҳмонхона қурувчиси Ойбек Олимов билан ҳам суҳбатлашди.
Айни пайтда қурилиш ишлари якун бўлган. Шовқин-сурон бўлмайди. Биномизни қуришдан аввал барча ташкилотлардан рухсат олганмиз. Барчаси қонуний. Бизга ҳеч ким бинони қуришдан аввал аҳоли билан келишасан, уларнинг розилигини оласан дейишмаган. Шу сабаб меҳмонхона ва савдо комплексимизни қуриб битказдик, — дейди қурувчи.
Мурожаатчиларнинг бу ҳақидаги шикоятига жавоб берган Қашқадарё вилояти Қурилиш бош бошқармаси масъуллари “Қутлуғ қадам” МЧЖ бинони қуришдан аввал улар билан келишиши кераклигини маълум қилган. Мутасаддиларнинг жавоб хатида “Ҳар қандай бино қурилиши қўшни участка эгалари билан келишилиши, турар жой уйи ва хўжалик биноларининг қўшни участкалардан кўриниш паналиги таъминланиши керак”, — деб жавоб қайтарган.
“Дарё” воқеалар ривожини кузатишда давом этади.
Изоҳ (0)