Бухоро шаҳрида маст эркак ички ишлар органи ходимини уриб, бурнини синдирди. Бу ҳақда вилоят Ички ишлар бошқармаси ахборот хизмати хабар берди. 

Хабарга кўра, 11 февраль куни соат 22:06 ларда вилоят ИИБ “102” марказлашган тизимига Бухоро шаҳар “А.Темур” кўчасида яшовчи Д.Д. исмли эркак маст ҳолатда турмуш ўртоғи билан жанжал қилаётгани тўғрисида мурожаат келиб тушган. Мазкур хабарнома асосида ҳодиса жойига Бухоро шаҳар Ички ишлар органлари фаолиятини мувофиқлаштириш бўлими 1-сон ИИБ профилактика инспектори ҳамда вилоят Ички ишлар бошқармаси ЖХХ ЖСТБ пост патрул хизмати баталёни ходимлари етиб борган.

Улар спиртли ичимлик истеъмол қилганликда гумон қилинган Д.Д.ни хизмат автомашинасида тиббий кўрикдан ўтказиш учун “Пиридастгир” кўчасида жойлашган 11-сон поликлиниканинг қабулхонасига олиб борган. Шу вақт Д.Д. ходимларнинг қонуний талабларига бўйсунмасдан, ҳеч бир сабабсиз уларни ножўя сўзлар билан ҳақорат қилган ва хизмат фаолиятини олиб бораётган HPБ профилактика инспекторининг юз қисмига қасддан мушт тушурган. 

Суд тиббий экспертизасининг хулосасига кўра, эркак ходимга “бурун суягининг ёпиқ синиши” билан кечган тан жароҳати етказиб, хизмат вазифасини бажаришдан воз кечишига мажбур қилган.

Мазкур ҳолат юзасидан Жиноят кодексининг 219-моддаси 2-қисми билан жиноят иши қўзғатилиб, дастлабки тергов ҳаракатлари олиб борилмоқда.