Самарқанд вилояти Каттақўрғон туманида яшовчи аёл Россия Федерациясида бўлган турмуш ўртоғи билан телефон орқали мулоқотда юзага келган келишмовчилиги сабабли икки нафар вояга етмаган фарзандларини уриб, ҳолатни тасвирга олганлиги ҳақидаги видеохабар ижтимоий тармоқлар орқали тарқалди. Ушбу ҳолат тармоқларда кенг муҳокамаларга сабаб бўлди. Мазкур масала юзасидан Бола ҳуқуқлари бўйича вакил — Болалар омбудсмани Алия Юнусова изоҳ берди.
Масъулларнинг ўрганишича, болаларни калтаклаган она турмуш ўртоғи билан севишиб турмуш қурган, 3 нафар фарзанди бор, фарзандлар 4, 3 ёш ва 7 ойлик.
Турмуш ўртоғи хорижга ишлашга кетган. Келин оиласида қайнопаси билан бир неча йилдан буён келишмай келгани сабабли ота уйига кетиб қолган. Ота уйида молиявий жиҳатдан қийналган, турмуш ўртоғидан пул юборишини талаб қилган. Натижада жанжал келиб чиққан ва мазкур ҳолат юз берган.
Мазкур ҳолат юзасидан Жиноят кодексининг 110-моддаси (қийнаш) 2-қисми билан жиноят иши қўзғатилиб, тергов ҳаракатлари олиб борилмоқда.
Айтилишича, болаларнинг отаси қонунда белгиланган мажбуриятларини бажармаганлиги, оилага учинчи шахсларнинг аралашуви болаларга нисбатан зўравонлик қилиш учун шарт-шароит яратган.
“Афсуски, болаларнинг онасидан бошқалар жавобгарликдан четда қолмоқда. Отанинг болаларига ғамхўрлик қилмаётганлиги ҳам болага нисбатан зўравонлик учун шарт-шароит яратган. Бундай ҳолатга йўл қўйган оила аъзоларини ҳам, аёлни ҳам мутлақо оқлаб бўлмайди”, — дейилади Болалар омбудсмани изоҳида.
Маълум қилинишича, Ўзбекистон Республикасининг “Болаларни зўравонликнинг барча шаклларидан ҳимоя қилиш тўғрисида”ги қонун лойиҳаси ишлаб чиқилган. Ушбу лойиҳада “ғамхўрлик кўрсатмаслик” тушунчаси очиб берилмоқда. Яъни, ғамхўрлик кўрсатмаслик – ота-оналар (уларнинг ўрнини босувчи шахслар) зарур имкониятлар, билим ва кўникмалар, шунингдек, тегишли хизматлардан (давлат, тиббий, таълим, ижтимоий ва бошқалар) фойдаланиш имкониятига эга бўлишига қарамай қармоғидаги боланинг соғлиғи, жисмоний, ақлий, маънавий ва ахлоқий ривожланишининг жиддий бузилишига олиб келиши мумкин бўлган жисмоний, моддий ва (ёки) психологик эҳтиёжларини қондирмаслик.
“Мазкур қонун лойиҳаси қабул қилиниб кучга киришини кутиб ўтириш, вақтни зое кетказиш билан баробардир. Шунинг учун юқоридаги ҳолатларнинг бошқа такрорланмаслиги, болаларга зулм қилинмаслиги учун ҳар ким ўз оиласини ислоҳ қилиши, фарзандларининг баркамол ўсиб улғайишига муносиб шароит яратиши керак. Катталарнинг ўзаро келишмовчилиги натижасида болаларнинг азобланиши жуда ачинарли ҳолат. Болалар ҳимояга муҳтож қатлам, уларни ҳимоя қилиш барчамизнинг олий бурчимизга айланмоғи зарур”, — дея қўшимча қилган Алия Юнусова.
Аввалроқ Самарқанд вилоят ИИБ бошлиғи Раҳмат Маматов Россиядаги эри билан жанжаллашиб қолиб, икки нафар қиз фарзандини калтаклаб видеога олган она воқеасига муносабат билдирган эди
Изоҳ (0)