Фуқаролик ишлари бўйича Тошкент шаҳар Учтепа туманлараро судида 13 июль куни бўлиб ўтган суд ишида ҳоким ёрдамчиси ишга қайта тикланди. Бу ҳақда адвокат Саидали Мухторалиев “Дарё”га маълум қилди.
Президентнинг “Маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартириш бўйича давлат сиёсатининг устувор йўналишлари тўғрисида”ги фармонига кўра, 2022 йилнинг январь ойидан ҳоким ёрдамчиси лавозими жорий этилган эди. Ўшанда бир қанча ташкилот, идоралар ходимлари, асосан, ташкилот раҳбарлари маҳаллада ҳоким ёрдамчиси сифатида ишга жалб қилинган.
Ҳоким ёрдамчиси лавозимига асосан жойларда юқори малакага ва иқтисодий-ижтимоий соҳаларда етарли тажрибага эга бўлган мутахассислар танланганди. Номзодлар асосан, тижорат банклари, вазирликлар ва давлат идораларининг қуйи тизимларидаги раҳбар, раҳбар ўринбосарларидан ёки раҳбарликка заҳирага олинган мутахассислардан олинган.
Адвокатнинг айтишича, Пирмуҳаммад Ҳушвақтов "Халқ банки" Юқори Чирчиқ филиали раҳбари бўлиб ишлаган ва кейинчалик туман ҳокимининг маҳалладаги ёрдамчиси вазифасига ўтказилган. Кейинроқ эса туман ҳокимининг ижобий тавсияномаси асосида Халқ банки раҳбариятига мурожаат қилиб, аввалги филиал бошқарувчиси лавозимига қайтаришларини сўрайди.
“Президент фармонининг 6-бандига асосан банк уни эски Меҳнат кодексининг 97-модда 1-банди билан келишув асосида бўшатишда унинг иш жойини сақлаб қолиш мажбуриятини олган эди. Бироқ, банк раҳбарияти уни ўз ишига қайтаришни рад қилди. Натижада иш судгача борди. Суд Пирмуҳаммад Ҳушвақтовни банкдаги ўз лавозимига тиклаш ҳақида қарор чиқарди”, — деди Саидали Мухторалиев.
Адвокатнинг тушунтиришича, аксарият вазирлик ва идоралар, тижорат банклари ўз ходимлари бўлган номзодларни эски Меҳнат кодексининг 97-моддаси 1-бандига асосан ўзаро келишув асосида бўшатиб, бўшатиш буйруқларида уларнинг иш жойларини 2 йил давомида сақлаб қолиниши кўрсатиб ўтилган.
“Кўплаб номзодлар иссиқ жойларини ушбу буйруқларга ишониб ва эрта бир кун ўз ишларига қайтиб келишларига умид қилиб тарк этади. Афсуски, бугунги кунда баъзи ҳолатларда ҳоким ёрдамчиларининг меҳнат ҳуқуқлари бузилаётганини ҳам кузатяпмиз. Ҳокимга ариза ёзиб, ҳоким ёрдамчиликдан бўшаганларнинг айримлари ҳозир ўз ишларига қайта олмаяпти. Ваҳоланки, уларни ишдан бўшатиш ҳақидаги буйруқларида иш жойи сақланиши аниқ кўрсатиб ўтилган”, — деди у.
Ўзбекистон Президенти ҳузуридаги Давлат хизматини ривожлантириш агентлиги ахборот хизмати раҳбари Севара Зокированинг “Дарё”га тушунтириш беришича, фармонга кўра, вазирликлар, идоралар, тижорат банклари, маҳаллий ижро ҳокимияти органлари раҳбарларига ҳоким ёрдамчилари лавозимига тайинланган ходимларнинг аввалги иш жойидаги лавозимини икки йилгача муддатга сақлаб қолиш, мазкур даврда ушбу лавозимга бошқа шахсларни муддатли меҳнат шартномаси асосида вақтинча ишга қабул қилиш тавсия этилиши белгиланган.
Изоҳ (0)