Саудия Арабистони валиаҳд шаҳзодаси Муҳаммад бин Салмон ва Бирлашган Араб Амирликлари (БАА) президенти Муҳаммад бин Зайд ан-Наҳён илгари яқин бўлганига қарамай, эндиликда улар Яқин Шарқда етакчилик учун рақобатчига айланди, деб ёзмоқда The Wall Street Journal (WSJ).
Газета ўз манбаларига таяниб, декабрь ойида бин Салмон БАА Саудия Арабистонига “орқадан пичоқ урганини” айтганига ишора қилди. Шу билан бирга, Саудия Арабистони раҳбари БААни Яман ва ОПЕКдаги сиёсати учун “жазолаш” билан таҳдид қилган.
Бошқа манбаларга кўра, ал-Наҳён бин Салмоннинг ҳокимият тепасига келиши, нефть сиёсатида Россия билан яқинлашиши ва Эрон билан дипломатик келишув каби таваккалчилик ҳаракатларидан норози. WSJ қайд этишича, Саудия шаҳзодаси ва БАА президенти олти ойдан ортиқ вақтдан бери гаплашмаган.
Нашр икки давлат рақобат қиладиган ёки келишмовчиликка борадиган соҳалар орасида иқтисодиёт ва Ямандаги можаро бўйича позициялардаги фарқни келтирди.
Етакчилар рақобати Вашингтонда хавотир уйғотмоқда.
“Бу икки юқори амбицияли инсонлар минтақада асосий ролни ўйнашни истайди. Қайсидир даражада улар ҳали ҳам ҳамкорлик қилмоқда. Аммо афтидан, энди улар бир-бирининг обрўсини хушламаётгандек. Охир оқибат, улар бир-бирининг ёқасига чанг солиши бизга фойда келтирмайди”, — деди газетанинг АҚШ маъмуриятидаги манбаси.
Ҳар икки мамлакат вакиллари WSJ’га берган расмий баёнотида келишмовчиликларни рад этди. БАА бундай даъволар ёлғон ва асоссиз деб атади. Саудия Арабистони эса бу маълумотларни нотўғри ҳисоблаб, Абу-Даби “яқин ҳамкор” эканини таъкидлади. Иккала давлатда ҳам сиёсатда умумий қарашлар мавжудлиги қайд этилди.
Изоҳ (0)