Эрон ҳар қандай давлатнинг, жумладан Украинанинг ҳудудий яхлитлигини ҳурмат қилади ва урушни сиёсий мулоқот орқали тугатиш зарурлигини таъкидлайди. Бу ҳақда Эрон ташқи ишлар вазири Ҳусайн Амир Абдуллоҳиян маълум қилди, деб ёзмоқда DW.
Шу билан бирга, ТИВ раҳбари Форс кўрфазидаги араб давлатлари ҳамкорлик кенгаши билан стратегик мулоқот якунлари бўйича Россия ҳам имзолаган декларацияга яна бир бор норозилик билдирди. Абдуллоҳияннинг сўзларига кўра, унда “Эронга қарши банд бор”. Ҳужжатда Эрон ўзиники деб ҳисоблаган Ҳормуз бўғозидаги учта орол (Абу Мусо, Катта Тунб ва Кичик Тунб) бўйича низони ҳал қилиш масаласида Бирлашган Араб Амирликларининг ташаббуси қўллаб-қувватланган.
“Россия элчиси ТИВга чақирилгач, Россия расмийларидан тушунтириш берилди, аммо биз уларни етарли деб ҳисобламаймиз ва Россия ёки бошқа мамлакат томонидан Эроннинг ҳудудий яхлитлиги бўйича бундай амалиётнинг такрорланишини қабул қилмаймиз”, — деди Эрон ташқи ишлар вазири.
Маълумот учун Эрон Россияга дрон етказиб беради, улардан Украинага қарши урушда фаол фойдаланилмоқда. Хусусан, АҚШ маълумотларига кўра, 2022 йил августидан 2023 йилнинг майигача Россия Эрондан 400 дан ортиқ, асосан, Shahed типидаги дронларни қабул қилиб олган ва уларнинг аксариятидан Украинанинг муҳим инфратузилмасига зарба беришда фойдаланган.
“Россияга бундай учоқларни етказиб бериш орқали Эрон Россиянинг Украинадаги босқинчилик урушига бевосита ҳисса қўшади”, — деб таъкидлайди Вашингтон.
2022 йил кузида Эрон Россияга “Фатеҳ-110” ва “Зулфиқор” баллистик ракеталарини етказиб бермоқчи экани маълум бўлганди. Март ойи бошида Financial Times газетаси Россиянинг кейин АҚШ Украинага узоқ масофага учувчи ATACMS ракеталарини етказиб бера бошлашидан қўрқиб, Эрондан ҳалигача баллистик ракета сотиб олмаётгани ҳақида ёзди.
Изоҳ (0)