Ихтисослаштирилган таълим муассасалари агентлиги, Президент мактабларига кириш имтиҳонларида Кембриж мутахассислари билан ҳамкорлик тўхтатилгани ҳақидаги тасдиқланмаган ахборотга жавобан, Cambridge University Press&Assessment ташкилотининг таълим йўналиши бўйича бош маслаҳатчиси Стив Кинг томонидан йўлланган расмий видеоизоҳни тақдим этди.
Стив Кинг унинг ташкилоти Ўзбекистондаги президент мактабларига қабул имтиҳонларида 2019 йилдан буён иштирок этаётганини айтиб, бу ҳамкорлик “узоқ йиллар давом этиши”га ишонч билдирди.
“Ўзбекистон Президент мактабларига қабул имтиҳонлари ҳақида гапириб ўтсам, 2019 йилдан буён ва бу йил ҳам ташкилотимиз Ўзбекистон Республикаси Ихтисослаштирилган таълим муассасалари агентлиги билан биргаликда ишлаб келади ҳамда имтиҳон саволларини тайёрлаш ва ўқувчиларни саралашда, натижаларни эълон қилишда иштирок этади.
Ҳар йили Ўзбекистонда минглаб талабгорлар 14 та ҳудуддаги Президент мактабларига кириш учун беллашадилар.
Бу йилги имтиҳонларнинг 1-босқичи учун 8 та турли хил вариантлардаги саволлар ишлаб чиқилди. Бунда саволларнинг такрорланмаслиги ва ҳар сменада ҳар хил саволлардан фойдаланган ҳолда шаффофликни таъминлашга интилдик.
Мурожаатчилар биздан бу йилги Президент мактаблари қабул имтиҳонларига бизнинг иштирокимиз йўқлиги ҳақидаги хабарларга ойдинлик киритишимизни сўрашди. Бу хабарлар асоссиз! Шуни ишонтириб айтаманки, биз 2019 йилдан бери жумладан бу йил ҳам Президент мактаблари қабул имтиҳонларида қатнашмоқдамиз.
Бизнинг ташкилотимиз қабул имтиҳонлари билан боғлиқ ҳамкорликдан мамнун ва ишонаманки, Ўзбекистон билан ҳамкорлигимиз узоқ йиллар давом этади”, — дейди мутахассис.
15 июль куни бўлиб ўтган Президент мактабларига кириш имтиҳонларининг биринчи босқичида 1-сменада тушган саволларнинг 2-сменада ҳам такрорлангани ҳақида хабарлар тарқалди. Ихтисослаштирилган таълим муассасалари агентлиги буни рад этиб чиқди. “Бир сменада берилган саволлар кейинги сменаларда айнан қўлланилмайди”, — дейилади муносабатда.
Ихтисослаштирилган мактаблар ҳақида
2022 йил 14 апрель куни президентнинг “Президент таълим муассасалари агентлиги тизимидаги ихтисослаштирилган мактаблар тармоғини кенгайтириш тўғрисида”ги фармони имзоланган. Унга кўра, 2023 йил 1 июнга қадар фаолияти тугатилган Меҳрибонлик уйлари ва Болалар шаҳарчалари негизида 5 та ихтисослаштирилган мактаб-интернати ҳамда 3 та ихтисослаштирилган мактаби; 2022—2024 йилларда Президент таълим муассасалар агентлиги тизимида 25 та ихтисослаштирилган мактаб-интернатлари қуриш ҳамда келгусида янги ихтисослаштирилган мактаб-интернатлар ва ихтисослаштирилган мактабларни фақат агентлик тизимида ташкил этиш каби вазифалар белгилаб берилган.
Изоҳ (0)