Зеленский офиси уруш қандай тугашининг учта вариантини эълон қилди

Украина президенти офиси раҳбари маслаҳатчиси Михаил Подоляк уруш қандай тугашининг учта вариантини эълон қилди.

Вариантлар орасида Украина учун ғалаба, мағлубият ёки Минск-3 эҳтимоли бор.

“Урушни тугатиш учун бор-йўғи учта вариант бор. Биринчиси: биз ғалаба қозонамиз ва шу тариқа минтақада тўлиқ ҳукмронлик қиладиган ва шунга мос равишда жуда аниқ ҳамкорликка эга бўлган Украина давлати мавжуд бўлиб қолади. У Украина қуролли кучларини модернизация қила олади ва самарали армияга эга бўлади”, — деди у.

Подолякнинг сўзларига кўра, бунга параллел равишда Россия билан демилитаризация зонаси пайдо бўлади, Россия маълум масофадаги ракеталардан маҳрум бўлади, Москва ядровий арсеналларини назорат қилиш бўйича саммит ўтказилади.

Иккинчи вариант Украинани йўқотиш бўлиши мумкин ва “шундан кейин Украина бир неча йил ичида аста-секин ўлади”.

“Учинчи вариант бор — оралиқ: биз ютқазмадик, лекин Минск-3 чегара чизиғи бор. Бу шунчаки жуда секин ўлишни англатади. Сизга яшашингизни қўллаб-қувватлайдиган қурилма уланади”, — деди Михаил Подоляк.

Унинг фикрича, бу Украина давлат сифатида мавжуд бўлмаслигини англатади.

“Шунинг учун, қолган вариантлар ниманидир қаердадир давом этиши учун баъзи муқобил элементларни топишга уринишдир. Бизнинг вариантларимиз жуда оддий — ғалаба қозониш ёки ютқазиш”, — таъкидлади Зеленский офиси раҳбари маслаҳатчиси.