“ПСЖ” мухлислари жамоага келиши кутилаётган Душан Влаҳовичга таҳдид қилди, дея хабар қилмоқда Marca.
Аввалроқ “ПСЖ” ушбу трансфер ойнасида ҳужум чизиғини “Ювентус” вакили билан тўлдирмоқчи экани ҳақида хабарлар янграганди. Қайд этилишича, Париж клуби сербиялик форвард учун 90 миллион евро тўлашга тайёр.
Ушбу хабарлар фонида “ПСЖ” ултраси футболчига таҳдид қилинган баннер суратини эълон қилди. Мухлислар “Агар келсанг, биз учта бармоғингни кесиб ташлаймиз” деб ёзилган баннер билан “Парк де Пренс” стадиони олдида суратга тушган ва уни ижтимоий тармоқларда эълон қилган.
Мухлислар катта эҳтимол билан Влаҳовичнинг Сербия терма жамоаси сафида шериклари билан амалга оширган қўл ҳаракатини назарда тутган. Ушбу қўл ҳаракати серб партизанларининг саломлашишини англатиб, айни вақтда сербияликлар бу ҳаракат орқали Косовадан устун экани ва уни тан олмаслигини билдириш учун ишлатади.
23 ёшли футболчи ўтган мавсум А Серияда 27 та ўйин ўтказиб, 10 та гол ва 2 та голли узатма муаллифига айланди.
Изоҳ (0)