“ПСЖ” мухлислари клуб офиси ёнида намойиш ўтказиб, Месси, Неймар ва Ҳелайфининг кетишини талаб қилди

“ПСЖ” ултраси клуб офиси ёнида намойиш ўтказди ва раҳбариятдан истеъфо талаб қилди.

Акция Collectif Ultras Paris (CUP) томонидан ташкил этилган. Улар “тизимли ва ақлли ҳаракат эвазига олдинга юришга эришиш” мақсадини шиор сифатида кўрсатган.

RMC Sport хабарига кўра, “ПСЖ” офиси олдида клубнинг юзлаб мухлислари тўпланган. Улар ўзи билан турли баннерлар ва пиротехника воситаларини олиб келган.

Мухлислар президент Носсир ал-Ҳейлайфидан истеъфо талаб қилган. Шунингдек, Неймар, Лионель Месси, Марко Вератти каби футболчиларни ҳам кетказиб юборишни талаб қилган.

Бу кемада капитан йўқ. Бизга актуал мавзуларга эътибор қаратадиган, илтимос қилинганда биз билан юзма-юз гаплашадиган президент керак. Футболчилар туфайли йил давомида шарманда бўляпмиз, — дейди ултрас раҳбари Ромен Мабил.

Офис олдига йиғилган мухлислар Мессига нисбатан ҳақоратли сўзларни ишлатган. Шунингдек, Неймарнинг Париждаги ҳовлиси атрофида ҳам мухлислар йиғилган ва футболчидан кетишни талаб қилган.

Аввалроқ Месси Лига 1 доирасидаги мағлубиятли ўйиндан кейин Саудия Арабистонига бесўроқ кетиб қолгани сабаб клуб томонидан икки ҳафтага ўйин ва машғулотлардан четлатилгани хабар қилинганди.

ОАВга кўра, аргентиналик футболчи ёзда Париж клубини тарк этади. Унга Саудия Арабистони клублари ва “Барселона”дан қизиқиш бор. Унинг “ПСЖ” билан амалдаги шартномаси мавсум якунида ўз ниҳоясига етади.

35 ёшли футболчи Франция чемпионатининг жорий мавсумида 28 та ўйин ўтказиб, 15 тадан гол ва голли узатма муаллифига айланди.