“PSJ” muxlislari jamoaga kelishi kutilayotgan Dushan Vlahovichga tahdid qildi, deya xabar qilmoqda Marca.
Avvalroq “PSJ” ushbu transfer oynasida hujum chizig‘ini “Yuventus” vakili bilan to‘ldirmoqchi ekani haqida xabarlar yangragandi. Qayd etilishicha, Parij klubi serbiyalik forvard uchun 90 million yevro to‘lashga tayyor.
Ushbu xabarlar fonida “PSJ” ultrasi futbolchiga tahdid qilingan banner suratini e’lon qildi. Muxlislar “Agar kelsang, biz uchta barmog‘ingni kesib tashlaymiz” deb yozilgan banner bilan “Park de Prens” stadioni oldida suratga tushgan va uni ijtimoiy tarmoqlarda e’lon qilgan.
Muxlislar katta ehtimol bilan Vlahovichning Serbiya terma jamoasi safida sheriklari bilan amalga oshirgan qo‘l harakatini nazarda tutgan. Ushbu qo‘l harakati serb partizanlarining salomlashishini anglatib, ayni vaqtda serbiyaliklar bu harakat orqali Kosovadan ustun ekani va uni tan olmasligini bildirish uchun ishlatadi.
23 yoshli futbolchi o‘tgan mavsum A Seriyada 27 ta o‘yin o‘tkazib, 10 ta gol va 2 ta golli uzatma muallifiga aylandi.
Izoh (0)