Янги чемпион. Уимблдон финалида Жоковични мағлуб этган 20 ёшли Карлос Алкарас ҳақида

Испаниялик 20 ёшли теннисчи Карлос Алкарас Уимблдон финалида афсонавий Новак Жоковични мағлуб этди. Қуйида испаниялик теннисчининг фаолиятига оид айрим маълумотлар тақдим этилади.

Бўлажак юлдуз 2003 йилнинг 5 май куни Мурсиядаги Эл-Палмар шаҳарчасида туғилган. Карлос теннисга бефарқ бўлмаган оилада ўсган. Унинг бобоси теннис клубининг дастлабки аъзоларидан бири бўлган, отаси эса ярим профессионал теннисчи бўлган ва теннис академиясини бошқарган.

Карлос ATP мусобақаларидаги фаолиятини 2020 йилнинг февралида, 16 ёшида бошлади. Унинг учун дебют турнир Rio Open бўлди. Дастлабки совринига эса 2021 йилдаёқ эга чиқди ва ўша йили рейтингда 35-ўринга қадар кўтарилди.

Алкараснинг устози Хуан-Карлос Ферреро ҳисобланади — собиқ биринчи рақамли ракеткачи. Ферреро Ролан Гарросда ғолиб чиққан йили унинг шогирди дунёга келганди. Испанияликлар тандеми 2018 йилнинг ёзидан бери биргаликда фаолият юритади.

Табиийки, Алкарас ўзи учун идеал сифатида Рафаэль Надални танлаган. “Грунт қироли” ўзининг дастлабки “Улкан тож”ини 2005 йилда, Карлос бор-йўғи 2 ёш бўлган вақтда қўлга киритган. Бу воқеадан бир йил ўтиб уч ёшли испаниялик илк бор қўлига теннис ракеткасини олади.

Надал билан тенглашиш осон эмас. У менинг кумирим, бунақаси фақат битта. Профессионал теннисчи бўлиб етишиш учун тинмай ишлайман, — деганди 16 ёшли Алкарас.

2022 йилда Алкарас фаолиятида биринчи марта ўз кумирини енгишга муваффақ бўлди. Бу ҳодиса Мадриддаги Мастерс турнирида юз берди.

“Менинг юртим яна бир ақл бовар қилмас ўйинчига эга бўлганидан ҳақиқатда жуда хурсандман. Испания унга узоқ йиллар давомида суяниши мумкин”, — деганди Надал ўйиндан кейин.

Алкарас илк “Улкан тож”ига 2022 йилда эга чиқди. 19 ёшли испан US Open финалида Каспер Руудни мағлуб этади (6:4, 2:6, 7:6, 6:3).

Ўша йили 19 ёш-у 4 ойлик Алкарас тарихдаги энг ёш биринчи рақамли теннисчига айланди. 2022 йил давомида 70 та ўйиннинг 57 тасини ғалаба билан якунлади ва бешта мусобақада ғолиб чиқди.

Алкарас профессионал фаолияти давомида чимли майдонда бор-йўғи 18 та учрашув ўтказган. Жорий йилда у чимли майдонларда мағлубиятсиз одимламоқда ва иккита мусобақани (Queen’s Club ва Уимблдон) ютишга улгурди.

Карлосга ютқазиб қўйган Жокович Уимблдонда 2017 йилдан бери илк бор мағлуб бўлди. Марказий кортда эса сербиялик теннисчи 10 йил деганда биринчи марта ютқазди.

20 ёшли теннисчи Уимблдондаги ғалаба орқали 3 миллион доллар ишлаб олди. Карлоснинг теннис орқали топган даромади умумий ҳисобда 19,6 миллионга етди.