Украина ташқи ишлар вазири Дмитрий Кулеба Шимолий Атлантика альянси саммитида “психологик тўсиқ”ни енгиб ўтишга муваффақ бўлинди, деб ҳисоблайди ва “Украина ҳақиқатан ҳам НАТО аъзоси сифатида кўриляпти”, деган фикрда. ТИВ раҳбарининг сўзларини “Европа ҳақиқати” нашри келтирди.
“Ёпиқ эшиклар ортида ҳамма жуда босиқлик билан айтяпти: хавотир олманг, масала ҳал, сиз НАТО аъзоси бўласиз”, — деди Кулеба.
Саммит натижаларидан қониқяпсизми, деган саволга вазир: “Умуман олганда, ҳа”, — деб жавоб берди.
“Мени фақат бир лаҳза қаноатлантирмади: саммит коммюникеси матнида Украина ё аъзоликка таклиф қилингани, ёки эртага шартли равишда таклиф қилиниши ҳақида аниқ гаплар йўқ”, — деди ТИВ раҳбари.
Вильнюсда бўлиб ўтган саммитда Киевдан Украинанинг НАТОга аъзо бўлиш бўйича ҳаракатлар режаси талабларига риоя қилиш заруратини олиб ташлашга қарор қилинди. Шу билан бирга, иттифоқчилар Украинани “барча шартлар бажарилгандагина” альянсга таклиф қилишини очиқ-ойдин билдирган. Бироқ саммитда Киев бажариши керак бўлган шартлар рўйхати ошкор этилмаган.
Украинанинг НАТОга аъзо бўлиш бўйича ҳаракатлар режаси — очиқ эшиклар сиёсатининг амалий ифодаси бўлиб, бешта йўналиш – сиёсий ва иқтисодий соҳалар, мудофаа жиҳатлари, ресурс масалалари, хавфсизлик ва қонунчилик бўйича аниқ қадамларни ўз ичига олади.
Украина альянс аъзоси бўлмаса-да, 2020 йил июнь ойидан бери НАТО билан ҳамкорликнинг алоҳида мақомига эга.
2022 йил 30 сентябрда Украина президенти Владимир Зеленский Киевнинг тезлаштирилган режимда НАТО аъзолигига ариза бериш қарорини эълон қилганди.
Изоҳ (0)