Россия Жанубий Африка Республикаси президенти Сирил Рамафосанинг 2023 йил августида бўлиб ўтадиган БРИКС саммитидаги делегациясига Владимир Путин ўрнига ташқи ишлар вазири Сергей Лавров бошчилик қилиш ҳақидаги илтимосини рад этди. Бу ҳақда ЖАР вице-президенти Пол Машатиле маҳаллий Mail & Guardian газетасига маълум қилди.
“Биз Рим статути билан боғлиқ эканимизни тушунамиз, лекин кимнидир таклиф қилиб, кейин уни ҳибсга ололмаймиз. Агар у (Путин) келмаса, хурсанд бўлардик”, — дея Машатиланинг сўзларини келтирди “РБК”.
Нашрнинг ёзишича, аввалроқ ЖАР ҳукумати Россия делегациясининг саммитда иштирок этиши бўйича учта вариант таклиф қилган:
- Россия делегациясига Россия Ташқи ишлар вазирлиги раҳбарлик қилади,
- Путин учрашувда онлайн иштирок этади,
- Учрашувга мезбонлик қилиш Хитойдан сўралади.
Машатилнинг сўзларига кўра, Ҳиндистон ва Бразилия саммитнинг Хитойда ўтказилишига қарши чиққан. Вице-президентнинг қўшимча қилишича, Путиннинг учрашувда иштирок этиши бўйича музокаралар давом этмоқда.
17 март куни Гаагадаги Халқаро жиноий суди Россия президенти Владимир Путинни ҳибсга олишга ордер берди. У Украинанинг босиб олинган ҳудудларидан болаларни Россияга ноқонуний депортация қилишда гумон қилинмоқда. Худди шундай ордер болалар ҳуқуқлари бўйича вакил Мария Лвова-Беловага нисбатан ҳам чиқарилган.
Изоҳ (0)