Қодиров Чеченистон раҳбарлиги учун кейинги сайловда ҳам қатнашишини айтди

Чеченистон раҳбари Рамзан Қодиров республикадаги навбатдаги сайловларда иштирок этишини маълум қилди.

“Мени четлатиб, ўрнимга бошқа одамни қидиришаётгани ҳақида миш-мишлар тарқалмоқда. Ҳеч ким ўрнимга одам қидирмаяпти, қидиришиларига ҳам йўл қўймайман. Муддат тугагач, Аллоҳнинг изни билан яна сайловда қатнашаман ва агар халқ сайласа, ишлашда давом этаман”, — деди Қодиров ўзининг Telegramъдаги каналида эълон қилган видеода.

У аҳолини “минтақадаги вазиятни беқарорлаштиришдан манфаатдор”ларнинг йўл-йўриқларига эргашмасликка чақирди.

Март ойида Қодиров ўзининг “оғир касаллиги” ҳақидаги хабарларни рад этиб, “соғлом ва куч-қувватга тўла” эканини даъво қилганди.

“Аввалгидек спорт билан шуғулланяпман, тоғларга чиқяпман, сайр қиляпман, республика тараққиётига оид муҳим масалаларни ҳал қиляпман”, — деб ёзди Чеченистон раҳбари ўзининг Telegram каналида.

Шунингдек, у қўлида тиббий асбоб эмас, балки электрон тасбеҳ тақиб юрганини тушунтирди. Июль ойида Чеченистон раҳбари Давлат Думаси депутати Адам Делимхонов билан биргаликда ижтимоий тармоқларда унинг касаллиги ва Делимхоновнинг ғойиб бўлгани ҳақидаги хабарлар пайдо бўлганидан кейин эфирга чиқди. Видеода улар ошхонада чой ичиб ўтириб, “ҳамма шайтон ва ғийбатчиларга” мурожаат қилган.

Қодиров 2007 йилдан бери Чеченистон раҳбари лавозимини эгаллаб келмоқда, у ўз лавозимида Россия ҳудудларининг бошқа барча раҳбарларидан кўра узоқроқ ишлаяпти. 2021 йил сентябрида Қодиров 99,7 фоиз овоз билан маҳаллий сайловларда ғалаба қозонган эди. Унинг ваколат муддати 2026 йилда тугайди.

Владимир Путин Чеченистон раҳбарининг натижасига изоҳ берар экан, бу “нореалдек туюлиши мумкин, аммо Қодиров бошчилигида республика қанчалик ўзгарганига эътибор қарацангиз, овоз бериш натижалари  шундай бўлиши аниқ эди”, деб таъкидлади.