Австралия Марказий банкининг (RBA) янги раҳбари аёл киши — Мишель Буллок бўлади, у ҳозирда Марказий банк раҳбари ўринбосари лавозимини эгаллаб турибди.
Австралия Марказий банкининг пресс-релизига кўра, Буллокнинг RBА раҳбари сифатидаги етти йиллик муддати 18 сентябрда бошланади.
Банкнинг амалдаги раҳбари Филипп Лоу ўз лавозимини 17-сентябр куни тарк этади.
1985 йилдан бери Австралия Марказий банкида ишлаб келаётган Буллок унинг тўққизинчи раҳбари ва бу лавозимни эгаллаган биринчи аёл бўлади. У Марказий банкнинг 63 йиллик тарихидаги энг улкан ислоҳот даврида уни бошқаради.
Жорий йилнинг апрель ойида Австралия ҳукумати Марказий банк фаолиятини ислоҳ қилиш бўйича таклифлар киритди, бу 2024 йил июлига қадар амалга оширилиши кутилмоқда.
Пул-кредит сиёсати қўмитаси тузилмасини ўзгартириш режалаштирилмоқда, бу Марказий банк раҳбарининг қабул қилинадиган қарорларга таъсирини сусайтиради. Қўмита йиғилишлари сони йилига 11 тадан 8 тагача қисқартирилади, ҳар бир йиғилиш Марказий банк раҳбари томонидан матбуот анжумани билан бирга ўтказилади.
Изоҳ (0)