“Она иши учун қонунан жавоб беради, аммо икки боланинг руҳияти мажруҳ бўлмади, деб ким кафил бўлолади?” — Самарқанд ИИБ бошлиғи икки боласини калтаклаган аёл ҳақида 

Самарқанд вилоят ИИБ бошлиғи Раҳмат Маматов Россиядаги эри билан жанжаллашиб қолиб, икки нафар қиз фарзандини калтаклаб видеога олган она воқеасига муносабат билдирди. Бу ҳақда “Дарё”га вилоят ИИБ ахборот хизмати хабар берди.

Таъкидланишича, Раҳмат Маматов мазкур воқеа содир бўлган ҳудуд масъуллари, жамоатчилик ва ОАВ вакиллари иштирокида йиғилиш ўтказган.

Касални яширсанг, иситмаси ошкор қилади, дейишганидек, бундай ҳолатни оқлаб бўлмайди. Мутасаддилар хонадонма-хонадон юриб, аҳоли муаммоларини ўрганмагани, хотин-қизларнинг дард-у ташвишига қулоқ тутмагани сабаб шундай ҳолат юзага чиқмоқда. Она албатта қилмиши учун қонун олдида жавоб беради. Аммо икки норасида қизалоқнинг руҳияти мажруҳ бўлмади, улар баркамол бўлиб улғаяди деб ким кафолат беради? Биз бунинг оқибатини ўйлашдан аввал бунга қарши курашишимиз, жамоатчилик фаол бўлиб, биргаликда ҳамкорликда ишлашимиз шарт ва зарур”, — деди бошқарма бошлиғи, полковник Раҳмат Маматов.

Масъул маҳаллалардаги “бешлик”лар ҳар бир хонадоннинг муаммо ва ижтимоий ҳолатини чуқур ўрганиши шартлигини таъкидлаган.

Эрига жаҳл қилиб боласини урган онанинг содир этган қилмиши вилоят ИИБ бошлиғи полковник Раҳмат Маматов томонидан туманда жамоатчилик ва ОАВ вакиллари иштирокида муҳокама қилинди. Бошқарма бошлиғи онанинг фарзандларига нисбатан содир этган шафқатсизлигини қаттиқ қоралаб, маҳалладаги “бешлик” ҳар бир хонадоннинг муаммо ва ижтимоий ҳолатини чуқур ўрганиши лозимлигини таъкидлаб, бу борада алоҳида чора-тадбирлар режасини ишлаб чиқиш бўйича мутасаддиларга топшириқлар берди”, — дейди Раҳмат Маматовнинг матбуот котиби Жаҳонгир Сагдуллаев.

Аввалроқ Самарқанд вилояти Каттақўрғон туманида 27 ёшли аёл Россияда ишловчи эри билан жанжаллашиши оқибатида икки нафар вояга етмаган қиз фарзандларини калтаклаб, уни тасвирга олиб, эрига жўнатгани, вилоят ИИБ матбуот котиби мазкур ҳолат бўйича жиноят иши қўзғатилгани маълум қилинганди.

2023 йилнинг 14 июль куни вилоятнинг Каттақўрғон тумани “Баландравот” МФЙга қарашли Туйнак қишлоғида яшовчи аёл Россияда бўлган турмуш ўртоғи билан телефон орқали мулоқотда юзага келган келишмовчилик сабабли икки нафар вояга етмаган фарзандларини уриб, ҳолатни тасвирга олиб, турмуш ўртоғига юборган.

Ҳолат юзасидан Жиноят кодексининг 110-моддаси (қийнаш) 2-қисми билан жиноят иши қўзғатилиб, тергов ҳаракатлари олиб борилмоқда.