“Ювентус” Европа Суперлигасидан чиқиб кетмоқчилигини маълум қилди 

Туриннинг “Ювентус” клуби Европа Суперлигасидан чиқиб кетмоқчи.

Туринликлар керакли жараёнларни бошлаганини маълум қилди.

“Ювентус” “Реал” ва “Барселона” (ҳали Суперлига ғоясидан воз кечмаган клублар) билан музокараларни бошлаган. Шартномани бекор қилиш фақатгина “Реал”, “Барселона” ва Суперлига лойиҳасида иштирок этувчи қолган клублар томонидан маъқулланганидан сўнг амалга ошиши мумкин. “Бянконерилар” бу борада баёнот билан чиқди. 

2021 йилнинг 18 апрель куни 12 клуб (“Манчестер Юнайтед”, “Манчестер Сити”, “Ливерпуль”, “Челси”, “Арсенал”, “Тоттенҳэм”, “Барселона”, “Реал”, “Ювентус”, “Атлетико”, “Интер” ва “Милан”) бошчилигида Европа Суперлигасига асос солинганди. Орадан икки кун ўтиб қатор клублар бирин-кетин лойиҳани тарк эта бошлади ва Суперлига лойиҳаси вақтинча тўхтатилди. Фақат “Реал”, “Барселона” ва “Ювентус” лойиҳани тарк этмаганди. 2023 йил бошида Суперлига қайта тикланиши борасида хабарлар тарқалди.

Эслатиб ўтамиз, 2022 йилнинг ноябрида молиявий айбловлар ортидан “Ювентус” раҳбарияти истеъфо берганди. Январь ойида эса клубнинг собиқ президенти Андреа Анелли ва бош директор Маурисио Арривабене 2 йилга, собиқ вице-президент Павел Недвед 8 ойга, Фабио Паратичи эса 2,5 йилга футболдан четлатилган.

2023 йилнинг январь ойида А Серияда клубдан 15 очко олиб қўйилган, апрель ойида қарор бекор қилинганди. Май ойида эса 10 очко олиб ташлаш борасида якуний қарор қабул қилинганди.